Во Скопје отворен проектот „Ќопру Младинска школа 2021“ поддржан од Дирекцијата на Турците во странство

СКОПЈЕ (АА) – На Меѓународниот балкански универзитет (ИБУ) во Скопје, вечерва е отворен традиционалниот проект „Ќопру Младинска школа 2021“, организиран од страна на здружението „Ќопру“ од Скопје, со поддршка на Дирекцијата на Турците во странство и сродните заедници (ЈТБ), јавува Агенција Анадолија (АА).

Претседателот на Здружението за култура, уметност и образование „Ќопру“, Хусрев Емин, заблагодарувајќи се на Дирекцијата на Турците во странство и сродните заедници (ЈТБ) истакна дека проектот е традиционален и се одржува од 2016 година.

„Како здружение ‘Ќопру‘ со проектот за младинска школа организираме семинари, културни активности, патувања, читања на книги, гледање на тематски филмови со цел да ги подобриме личните вештини на младите што живеат особено во Скопје, да стекнат искуства во областа на културните и социјалните активности и да овозможиме појава на нови таленти“, нагласи Хусрев Емин, додавајќи дека проектот се одвива во рамките на Балканската младинска школа на ЈТБ.

Истакнувајќи дека Балканската младинска школа претставува еден бренд, Емин рече дека Дирекцијата на Турците во странство и сродните заедници (ЈТБ) проектот го реализира и во Северна Македонија и во другите балкански земји.

Координаторот на проектот „Ќопру Младинска школа 2021“, Мехмед Ариф, истакна дека проектот е поддржан од Дирекцијата на Турците во странство и сродните заедници (ЈТБ) која дејствува во рамките на Министерството за култура и туризам на Република Турција.

„Нашата цел е да ги собереме младите луѓе од турската заедница кои живеат во регионот, во Северна Македонија, и да придонесеме за нивниот интелектуален и културен развој“, нагласи Мехмед Ариф, координаторот на проектот.

Традиционалниот проект „Ќопру Младинска школа 2021“ ќе трае три месеци, а во него ќе учествуваат 110 млади лица.