Босна и Херцеговина бара од ЕУ да размисли за доделување кандидатски статус

САРАЕВО (АА) - Хрватски член на Претседателскиот совет на Босна и Херцеговина во вторникот испрати официјално барање до Европската Унија за разгледување на доделување кандидатски статус на земјата, првиот чекор во аплицирањето за да стане членка на блокот, јавува Агенција Анадолија (АА).

Истакнувајќи дека добивањето статус на кандидат за ЕУ ќе ја зајакне безбедноста и суверенитетот на земјата, Комшиќ рече дека иако тоа не подразбира некоја посебна процедура во практика, сепак е соодветен начин да се забрза процесот кон полноправно членство, имајќи ги предвид геополитичките трендови.

Комшиќ го испрати писмото до претседателот на Европскиот совет, Шарл Мишел, претседателката на Европската комисија, Урсула фон дер Лајен, шефот за надворешна политика на ЕУ, Жозеп Борел и еврокомесарот за соседска политика и проширување, Оливер Вархеји.

Во писмото Комшиќ ја нагласува потребата за гледање на Западен Балкан како дел од Европа во услови на руската војна против Украина.

„Со оглед на околностите, би сакал да ја разгледате можноста за доделување кандидатски статус на Босна и Херцеговина во рамките на институциите на Европската Унија“, рече тој.

Војната на Русија против Украина, која започна на 24 февруари, наиде на меѓународна осуда, доведе до финансиски санкции кон Москва и поттикна повлекување на светски фирми од Русија.

Најмалку 474 цивили се убиени, а 861 е повреден во Украина од почетокот на војната, според ОН, кои истакнаа дека условите на теренот отежнуваат да се утврди вистинскиот број.

„Околу 2 милиони луѓе побегнаа и во соседните земји“, соопшти Агенцијата за бегалци на ОН.