Kemal Zorlak
16 Јуни 2023•Ажурирај: 19 Јуни 2023
САРАЕВО (АА) - Членот на Претседателството на Босна и Херцеговина, Денис Беќировиќ, реагираше на, како што рече, злонамерните и неточни тврдења на Милорад Додик, претседателот на босанскохерцеговскиот ентитет Република Српска, дека за време на војната Сараево не било ниту под опсада, ниту опколено, велејќи дека шегите на Додик сигурно не можат да ги избришат фактите и пресудите на судовите на Обединетите нации, јавува Анадолу.
„Последната изјава на претседателот на босанскохерцеговскиот ентитет РС, Милорад Додик, е уште една во низата негови обиди да ја измами и дезинформира јавноста по примерот на најлошите пропагандисти од 20 век, но кои секако не можат да ги избришат фактите и пресудите на судовите на Обединетите нации. Опсадата на Сараево започна на 5 април 1992 година и траеше 1.425 дена. За време на бруталната опсада на главниот град на Босна и Херцеговина, убиени се 11.541 граѓанин на Сараево, меѓу кои 1.601 дете. Ова се фактите“, рече Беќировиќ и додаде:
„Злосторниците ги убиваа децата од Сараево, старици, жени, граѓани и граѓанки на Сараево. За тоа денес сведочат бројните гробници и гробови на невино убиените жители на Сараево низ градот. Милорад Додик и неговите следбеници никогаш нема да можат да негираат дека Сараево се бранеше и дека победи идејата за заеднички живот и на мултиетничкиот главен град на Босна и Херцеговина.“
Беќировиќ истакна дека насоченото и неморално негирање на злосторствата извршени врз цивилите во главниот град на Босна и Херцеговина од страна на Додик се заснова на идеологијата на злото, која за жал живее и денес. Таа идеологија доведе некои од претходниците на Додик зад решетки. Законите на Босна и Херцеговина се јасни и не дозволуваат негирање на геноцид, злосторства против човештвото и други злосторства.
„Сметам дека овие недозволиви и нецивилизирани постапки на Милорад Додик, кои генерираат омраза и недоверба во Босна и Херцеговина, треба веднаш да бидат санкционирани. Уште еднаш ги повикувам претставниците на Европската Унија да се приклучат на санкциите на демократскиот свет против политичарите кои го загрозуваат Дејтонскиот мировен договор и негираат правосилни меѓународни судски пресуди. Ќе завршам со пораката што ја претставив по повод Денот на градот Сараево, 6 Април, а тоа е дека Сараево и Босна и Херцеговина од година во година ќе бидат посилни и покрај обидите за ширење невистини“, се вели во изјавата на Беќировиќ.
