„Се бориме за систем кој ги цени знаењето, правдата и слободата“, порачаа на масовен граѓански протест во Ниш

НИШ (АА) - На плоштадот ‘Крал Милан’ во Ниш денес се одржува масовен граѓански протест наречен „Студентски едикт (указ)“, кој ќе трае цели 18 часа, известува Анадолу.

Непрегледни колони луѓе со транспаренти и знамиња се движат по централните улици.

Пред протестот, студентите најавија дека „едиктот е нивната одлука да се борат за систем кој ги цени знаењето, правдата и слободата“.

„Сега студентите од Србија го носат својот студентски едикт, порака дека повеќе нема да прифаќаме неправда, корупција и неефикасен систем што нѐ ограничува. Се собираме во центарот на Ниш на 1 март затоа што знаеме дека заслужуваме подобро, не само во образованието, туку и во општеството“, порачаа студентите во својот повик за протест.

Протестниот простор е поделен на зони за главната програма, за одмор, храна и пијалоци и за поддршка на програмата со спортски активности и филмски проекции.

Демонстрантите, вклучувајќи ги и студенти од сите универзитети во Србија, се собраа на четири локации во 9 часот - на раскрсницата на улиците Вардарска и Јована Ристиќ, кај Соборната црква, кај поранешната фабрика Нитекс и пред Медицинскиот факултет. Колони од граѓани потоа се движеа кон крајната дестинација со најчестиот повик „пумпај“.

На собирното место на плоштадот ‘Крал Милан’ во 11:52 часот, се одржа петнаесетминутен молк во спомен на петнаесетте лица кои загинаа во уривање на настрешница на Железничката станица во Нови Сад пред четири месеци.

Главната програма е најавена за 17 часот и 52 минути, кога ќе се одржи уште еден помен, по потоа на насобраните ќе им се обратат говорници. Во текот на целата вечер ќе има настапи на хор, музички бендови и други изведби. Последниот помен за денес ќе се одржи во 23 часот и 52 минути, по што ќе следи акција за чистење до завршување на блокадата во 3 часот по полноќ.

Жителите на Ниш последниве денови самостојно се организираа преку социјалните мрежи за да обезбедат сместување, храна и друг вид помош на гостите од другите градови.

Средношколци, студенти и други граѓани кои на почетокот на неделата пеш и со велосипед тргнаа кон Ниш од сите делови на земјата, па и од градовите оддалечени повеќе од 150 километри, вчера пристигнаа на својата дестинација, а синоќа беа свечено пречекани пред Народниот театар со огномет. Тие викендов ќе преноќат во спортската сала „Чаир“, училишните сали и училници, но и во студентските домови на Ниш.

Студентите вклучени во блокада најавија дека следниот масовен протест ќе се одржи во Белград на 15 март.

Студентите и граѓаните протестираат од крајот на минатата година, откако 15 лица загинаа при уривање на настрешница на Главната железничка станица во Нови Сад на 1 ноември.

Под блокада се вклучени најмалку 63 факултети на пет државни универзитети, два приватни факултети и четири стручни школи.

Српскиот премиер Милош Вучевиќ поднесе оставка од функцијата шеф на владата, а ширум земјата започнаа истраги и апсења на осомничени за корупција.