هەولێر.. ئیدانەی سووکایەتی کردن بە قورئانی پیرۆز

تۆڕی رێكخراوەكانی كۆمەڵگەی مەدەنی ناڕەزاییەتی خۆیان دەگەیەننە داواكاری گشتیی و وەزارەتی ئەوقاف و كاروباری ئایینی سەبارەت بە سووكایەتی كردن بە قورئانی پیرۆز لەلایەن هاووڵاتییەكی هەرێمی كوردستان كە دانیشتووی ئەورووپایە.

دوای ئەوەی هاووڵاتییەكی خەڵكی هەرێمی كوردستان و دانیشتووی وڵاتێكی ئەورووپا بە مەبەستی ئەنجامدانی پرۆسەی هاوسەرگیری سورەتی ئەلنیساءی لە قورئانی پیرۆز وەكو مارەیی پێشوەختە دڕاندووە و وێنەكانی لە تۆڕە كۆمەڵایەتییەكان بڵاوكردەوە و ئەمەش بووە هۆی ناڕەزایەتی لەلایەن موسۆڵمانان.

تۆڕی رێكخراوەكانی كۆمەڵگەی مەدەنی لە هەرێمی كوردستان، لە بەیاننامەیەكدا ئیدانەی ئەم كارە دەكات و داواش لە داواكاری گشتیی و وەزارەتی ئەوقاف و كاروباری ئایینی دەكات كە لە رێگای ناوەندەكانی یاسایی لێپێچینەوە لەگەڵ ئەو هاووڵاتییەدا بكەن.

لە بەیاننامەكەدا هاتووە "گەلی كوردستان لە دێر زەمانەوە گەلێكی موسوڵمان و خوداناس بووە و هەمووكات بەو پەڕی رێزەوە لە هەموو ئایین و نەتەوە و رەگەزێكی دیكەی روانیووە و هەمیشە گیانی پێكەوە ژیان لە كوردستاندا هەبووە".

لە بەیاننامەكەدا ئاماژە بەوە كراوە كە ئەم جۆرە كارانە دەستێكی دیكەی لە پشتەوەیە بۆ ناشرین كردنی ئایینی ئیسلام و پێویستە ناوەندەكانی نێودەوڵەتی لێ ئاگادار بكرێتەوە.

لە بەشێكی دیكەی بەیاننامەكەدا هاتووە "ئێمە لە رێكخراوەكانی كۆمەڵگەی مەدەنی دژی هەر هەوڵێك دەوەستینەوە كە ببێتە هۆی ناشرینكردنی قورئانی پیرۆز و هەر ئایین و كتێبێكی دیكە و بۆ ئەم مەبەستە داوا لە مامۆستایانی ئایینی دەكەین كە هەڵوێستی خۆیان لەمبارەیەوە رابگەیەنن بۆ فشار خستنە سەر لایەنەكانی پەیوەندیدار بە مەبەستی ئیدانەكردن و بنەبڕكردنی ئەم كارە".

رێكخراوەكانی كۆمەڵگەی مەدەنی پێیان وایە هەندێك لایەن ئەم كارە بە ئاراستەیەكی دیكەدا دەبەن و لە درێژەی بەیاننامەكەدا هاتووە "رەنگە ئەم كارە بە مەبەستی دیكە بەكاربهێندرێت و بەشێك لە عەرەبەكان گشتاندنی بۆ بكەن و بە شەقامی عەرەبی بڵێن هەموو كورد بەم جۆرە لە ئیسلام دەڕوانێت، كە بێگومان ئەمە پێچەوانەكەی راستە".

رێكخراوەكانی كۆمەڵگەی مەدەنی ئاماژە بە گرتنەبەری رێگای یاسایی دەكەن بە مەبەستی بە سزا گەیاندنی ئەو هاووڵاتییە و لە كۆتایی بەیاننامەكەدا هاتووە: "ئێمە كۆمەڵێك لە رێكخراوەكانی كۆمەڵگەی مەدەنی بە مەبەستی دووبارە نەبوونەوەی ئەم كارە قێزەوەنە و بە سزا گەیاندنی ئەو هاووڵاتییە، ئەوا كۆمەڵێك لە رێكخراوەكانی كۆمەڵگەی مەدەنی لە رێگای داواكاری گشتیی سكاڵا لەسەر ئەو هاووڵاتییە تۆمار دەكەین و لە نزیكەوە چاودێری دۆسیەكە دەكەین".