لە ئێران رێژەی تەڵاق روو لە هەڵکشانە

سەرۆکی فەرمانگەی باری شارستانی ئێران حەمید درەخشان نیا رایگەیاند لە ماوەی چوار مانگی رابردوودا رێژەی تەڵاق لە ئێران بەراورد بە ساڵی رابردوو لەسەدا ٢.٢ زیادیکردووە و رێژەی هاوسەرگیریش بەهەمان رێژە کەمیکردووە.

لە هەواڵێکی ئاژانسی ئیسنادا هاتووە کە درەخشان نیا رایگەیاندووە: ''لەماوەی چوار مانگی رابردوودا رێژەی تەڵاق بەراورد بە ساڵی رابردوو لەسەدا ٢.٢ زیادیکردووە و رێژەی هاوسەرگیری بەرێژەی لەسەدا ٢.٢ کەمیکردووە''.

درەخشان نیا ئاشکرایکردووە بەپێی دوایین ئامارەکان تەمەنی جیابوونەوە لەلای پیاوان ٣٠.٥ ساڵ و لای ژنان ٣٠.٦ ساڵە، هەروەها لەماوەی چوار مانگی رابردوودا ٥٥ هەزار و ٧١٨حاڵەتی جیابوونەوە هەبووە و ئەم رێژەیەش بەراورد بە ساڵی رابردوو لەسەدا ٢.٢ زیادیکردووە.

حەمید درەخشان نیا باسی لەوەشکردووە لەهەمان ماوەدا ٢٢٣٤ هەزار و ٩٨٢ هاوسەرگیری ئەنجامدراون و ئەم رێژەیەش بەراورد بە ساڵی رابردوو لەسەدا ٢.٢ کەمیکردووە.

سەرۆکی فەرمانگەی باری شارستانی ئێران ئاماژەی بەوەشکردووە زۆرترین حاڵەتی جیابوونەوە لە پارێزگاکانی ئەلبورز، گیلان، خۆراسانى رەزەوی و کرماشان و کەمترینی لە پارێزگاکانی سیستان وبەلوجستان، یەزد و چووارمەحەل و بەختیارییە.

ئاماژە بەوەدەکرێت بەرزبوونەوەی رێژەی تەڵاق و کەمبوونەوەی رێژەی هاوسەرگیری بەهۆی ئەو کێشە ئابوورییانەوەیە کە لەو وڵاتە بوونی هەیە.