سلێمانى.. دروست کردنى پرۆژەى شانۆی رۆمانى

سلێمانی - AA
شاری سلێمانی پایتەختی رۆشنبیری ھەرێمی کوردستانە، لەگەڵ ئەوەشدا لە بواری ھونەری لەلایەن حکوومەتی ھەرێمی کوردستانەوە خزمەتی ئەو شارە کراوە، بۆ زیاتر گرنگی دان بە بواری ھونەری شانۆ لە ئێستادا کارەکانی دروست کردنی پرۆژەی شانۆی رۆمانی لە قۆناغی کۆتایی دایە.
شانۆی رۆمانی لەسەر دیزاینی شانۆی کۆلۆسیۆمی رۆمانییەکان دروست دەکرێت کە لە سەردەمی ئیمپراتۆرییەتی رۆمانییەکاندا دامەزراوە، بە گوتەی سەرپەرشتیاری پرۆژەکە، هۆڵی شانۆیەکە گەورەترین ھۆڵی شانۆ دەبێت لە رۆژھەڵاتی ناوەڕاستدا.
سەرپەرشتیاری پرۆژەکە و بەڕێوەبەری پارکی ھەواری شار، رێبین جەمیل بە ئاژانسی ئانادۆڵوی راگەیاند: "ئەم پرۆژەیە بریتییە لەپرۆژەی شانۆی رۆمانی لەسەر شێوەی شانۆی رۆمانییەکان دروست کراوە، رووبەرەکەی ١٥ ھەزار مەتر دووجایە و لە ناو پارکی ھەواری شار دروست کراوە، پرۆژەکە نزیکەی ٦ ملیار دیناری لەسەر بوودجەی پایتەختی رۆشنبیری بۆدابین کراوە".
گوتیشی: "ئەم پرۆژەیە بۆ برەودانە بە شاری سلێمانی وەک پایتەختی رۆشنبیری کە دەبێتە ھۆکاری پێشخستنی بواری رۆشنبیری لە ھەرێمی کوردستان و بەتایبەت شاری سلێمانی ھەروەھا دەبێتە هۆی برەودان بە کە چالاکیە رۆشنبیرییەکان و خەڵکانێکی زۆریش دەتوانن لێرەوە بینەری کاری شانۆیی بن".
لە بارەی پێکھاتەی پرۆژەی شانۆی رۆمانی سەرپەرشتیاری پرۆژەکە گوتی: "پێکھاتەی سەرەکی ئەم پرۆژەیە بەجۆرێکە کە شوێنی دانیشتنی زیاتر لە ٥ھەزار کەسی تێدا دەبێتەوە کە دەتوانن بینەری کارە ھونەرییەکان بن، ھەروەھا کافیتریایەک لەم پرۆژەیەدا دروست کراوە لەگەڵ چەند ژورێک کە بۆ کاورباری کارگێڕی بەکار دەهێنرێت".
سەرپەرشتیاری پرۆژەکە ئەوەشی راگەیاند: "لە سەرجەم وڵاتان شانۆی کراوە ھەیە بەڵام لە ھەرێمی کوردستاندا ئەم شانۆییە نەبووە لە شوێنەکانیش وەک پێویست نەدەتوانرا فێستیڤاڵی نێودەوڵەتیی ئەنجام بدرێت، بۆیە بە دروستکردنی ئەم شانۆ ڕۆمانییە دەتوانرێت فێستیڤاڵە نێودەوڵەتیەکانیش لە ھەرێمی کوردستان ئەنجام بدرێت وەک فێستیڤاڵی قەرتاج و جەرەش کە فێستیڤاڵی نێودەوڵەتین، ھەروەھا گەورەترین ھۆڵی شانۆ دەبێت لە رۆژھەڵاتی ناوەڕاستدا.
رێبین جەمیل لەبارەی تەواوبوونی پرۆژەکەوە گوتی: "ئەم پرۆژەیە ماوەی جێ بەجێ کردنەکەی دوو ساڵ بوو بەڵام بەھۆی قەیرانی دارایی کە کاریگەری کردە سەر پرۆژەکە نەتوانرا لەکاتی خۆیدا تەواو بکرێت، لەگەڵ ئەوەشدا پرۆژەکە لە قۆناغی کۆتاییدایە کە ٧٥% پرۆژەکە تەواو بووە تەنھا ژوورەکانی ماوە تەواو ببن".
بە گوتەی رێبین جەمیل، چاوەڕوان دەکرێت لە ناوەڕاستی ئەمساڵدا پڕۆژەکە تەواوە بکرێت. ھەروەھا ھەواری شار چالاکیی جۆراوجۆری تێدا بەڕیوەدەچێت و ساڵانەش فێستیڤاڵی نێودەوڵەتی و کۆنسێرت ھەر لەم شوێنە دەکرێت.
تەندەری پرۆژەکە رۆژی ٣/٩/٢٠١٤ دراوەتە کۆمپانیایەک، دەبوو لە ماوەی ٦٠٠ رۆژدا تەواو بکرێت، بەڵام بەھۆی گۆڕانکاریی لە دیزاینی شوێنی دانیشتنی بینەرەکان و ھەروەھا بەھۆی نەبوونی بوودجە، ماوەی ساڵێک کارکردن لە پرۆژەکەدا وەستا.
رووکاری دەرەوەی شانۆکە و شوێنی دانیشتنی بینەرەکان بە جۆرە بەردێکی تایبەت دروست دەکرێت کە کەسی شارەزا کاری تێدا دەکات و بەردەکانیشی لە ووڵاتی ئێرانەوە بۆ دەھێنرێت، ئەو بەردانەش شێوازێکی مێژوویی کۆن بە شانۆییەکە دەبەخشێت.
تایبەتمەندیی شانۆییەکە بە جۆرێکە کە سیستەمی دەنگی تێدا بەکارناھێنرێت، بەڵکو لە کاتی نمایشی شانۆی یان بەڕیوەچوونی کۆنسێرت، ئامادەبووان بێ جیاوازی شوێنی دانیشتن، بە یەک ئەندازە گوێیان لە دەنگەکە دەبێت".
شاری سلێمانی بە بڕیاری ژمارە ١٤ی پەرلەمانی کوردستان، لە ساڵی ٢٠١٢ـەوە وەکو پایتەختی رۆشنبیری ناسێنراوە. حکوومەتی ھەرێمی کوردستان بڕی ٢٠ ملیار دیناری بۆ تەواوکردنی پێداویستییەکانی پایتەختی رۆشنبیری تەرخان کردووە، لەو بوودجەیەش بڕی شەش ملیار دیناری بۆ شانۆی رۆمانی تەرخان کراوە.