جۆگەی خوێ سەرنجی گەشتیارانی بۆ پارێزگای ئیدر راکێشاوە

ئیدر- AA

لە شارۆچکەی توزڵوجا کە خاوەنی یەدەگێکی زۆری خوێیە، لە دامێنی چیای توز ئاوێکی سوێر هەڵدەقوڵێت کە دەڕژێتە رووباری ئاراسەوە.

ئەم جۆگەیە کە لە بەیەکگەیشتنی چەند کانیاوێک پێکدێت، بەهۆی ئەو رێژە زۆرەی خوێ کە تیایدایە رەنگی سپی بووە و لە جۆگەیەکی بەستوو دەچێت.

جۆگەکە بە خاکێکی رووتەندا تێدەپەڕێت کە بە خاکی سور ناودەبرێت و بەهۆی بەرزی رێژەی خوێ تیایدا هیچ رووەکێکی تیادا ناڕوێت.

ئەو دیمەنە سەرنجڕاکێشەش ژمارەیەکی زۆر گەشتیاری بۆ خۆی راكێشاوه‌.

دانیشتووی ناوچه‌كه‌، مەتین گوموشتەکین، کە بەشێوەی خۆبەخش کاری رێبەری بۆ گەشتیاران دەکات، لە لێدوانێکیدا بۆ ئاژانسی ئانادۆڵو رایگەیاند: "شارۆچکەی توزڵوجا بەهۆی هەڵکەوتە جوگرافییەکەیەوە لە رووی سامانی خوێوە ناوچەیەکی گرنگە. زۆر کەس کە دێن بۆ ئێرە دەڵێن پێشتر شوێنی لەم شێوەیەمان نەبینیوە".

مەتین گوموشتەکین باسی لەوەشکرد کە لە ماوەی رابردوودا جۆگەی خوێ بووەتە جێگای باس و گوتی: "بەگشتی لە شارەکانی دەورووبەر و ناوچە نزیکەکانەوە خەڵک بۆ پشووی کۆتایی هەفتە دێنه‌ سەردانی ئێرە. هەرچەندە ئێرە لە رووی گەشتیارییەوە گرنگییەکی تایبەتی هەیە بەڵام وەک پێویست نەناسێنراوە. ئەگەر ئەم جۆگەیە زیاتر بناسێنین سوودی بۆ لایەنی گەشتوگوزاری شارۆچکەکەمان دەبێت".

یه‌كێك له‌و گه‌شتیارانه‌ی سه‌ردانی جۆگه‌كه‌ی كردووه‌، عەلی دۆغان، باس لەوە دەکات پێشتر هەرگیز دیمەنی سروشتی لەو شێوەیەی نەبینیوە و کاتێک هاوڕێکانی پێیان گوتوە شوێنێکی لەو شێوەیە هەیە هاتووە تا لە نزیکەوە بیبینێت.