بۆب دایلان خه‌ڵاتی نۆبڵ-ی له‌بواری ئه‌ده‌بدا به‌ده‌ست هێنا

ئه‌نقه‌ره‌ - AA
خه‌ڵاتی نۆبڵی ئه‌مساڵ له‌بواری ئه‌ده‌ب به‌خشرا به‌ ئاوازدانەری ئه‌مریكی، بۆب دایلان.
ئه‌كادیمیای زانستی شاهانه‌ی سوید له‌ كۆنگره‌ی رۆژنامه‌وانیدا رایگه‌یاند کە به‌هۆی ئه‌و گوزارشته‌ نوێیه‌ی کە له‌ڕێگه‌ی هۆنراوه‌وه‌ له‌ ئاوازدانانی ئه‌مریكیدا به‌رهه‌می هێناوه‌، خه‌ڵاتی نۆبڵ له‌ بواری ئه‌ده‌ب ده‌به‌خشێته‌ دایلانی ته‌مه‌ن 75 ساڵ. به‌مه‌ش دایلان بووه‌ خاوه‌نی خه‌ڵاتێك كه‌ به‌هاكه‌ی هه‌شت ملیۆن كرۆنی سویدیه‌.
له‌ 10ی كانوونی یه‌كه‌می ئه‌مساڵدا، كه‌ ده‌كاته‌ ساڵڕۆژی كۆچی دوایی ئه‌لفێرد نۆبڵ، رێوڕه‌سمێك بۆ به‌خشینی خه‌ڵاته‌كه‌ رێكده‌خرێت و، له‌گه‌ڵیدا بڕوانامه‌ و مه‌دالیای ئاڵتوونی ده‌به‌خشرێته‌ دایلان.
كاندیدان بۆ خه‌ڵاتی قه‌شه‌نگترین خه‌ڵاتی جیهانی له‌ بواره‌كانی ئه‌ده‌ب و زانستدا، له‌لایه‌ن ئه‌ندامانی ئەو ده‌سته‌یه‌وه‌ دیاری ده‌كرێن كه‌ بۆ هه‌ر بوارێك پێكهێنراوه‌. هه‌روه‌ها ئه‌و كاندیده‌ی کە زۆرترین ده‌نگی ئه‌ندامانی ئه‌كادیمییه‌كه‌ به‌ده‌ست بهێنێت ده‌بێته‌ براوه‌ی خه‌ڵاته‌كه‌.
بۆب دایلان؛ له‌ 24ی مایسی 1941دا، له‌ شاری دولوسی سه‌ربه‌ ویلایه‌تی مینیسۆتای ئه‌مریكا له‌ خێزانێكی جوولەکە له‌دایك بووه‌ كه‌ باری داراییان مامناوه‌ند بووه‌. به‌هۆی ئه‌وه‌ی حه‌زی به‌ میوزیكی فۆڵكلۆری ئه‌مریكی و بلویس كردووه‌، هه‌ر له‌ ته‌مه‌نی منداڵییه‌وه‌ به‌شداری له‌ چه‌ندین گرووپدا كردووه‌.
بۆب دایلان، ناوی راسته‌قینه‌ی رێبێرت ئاڵن زیمه‌رمان-ه‌ و له‌ ساڵی 1961دا رۆیشتووه‌ بۆ نیویۆرك و، له‌وێ جۆن هامۆند-ی ناسیوه‌.
دایلان، له‌ ساڵی 1962دا، یه‌كه‌مین ئه‌لبوومی به‌ناوی "بۆب دایلان" بڵاوكرده‌وه‌. پاشان ئه‌لبومێكی بێ شوماری ده‌ركرد و، له‌ گۆرانییه‌كانیدا باسی له‌ شوێنی مرۆڤ كردووه‌ له‌ ناو كۆمه‌ڵگه‌دا، له‌گه‌ڵ ئایین، سیاسه‌ت و خۆشه‌ویستی.
دایلان كه‌ به‌ یه‌كێك له‌ گوته‌بێژه‌كانی نه‌وه‌ داده‌نرێت، گۆرانییه‌كانی وه‌ك؛ "Blowin' in the Wind" و "The Times They Are a-Changin'" بوونه‌ته‌ مارشی مافه‌كانی مرۆڤی ئه‌مریكی و بزووتنه‌وه‌كانی دژبه‌ جه‌نگ.
دایلان كه‌ فرۆشی ئه‌لبوومه‌كانی 100 ملیۆنی تێپه‌ڕاندووه‌، هه‌میشه‌ به‌ ئاوازدانه‌رێك ئه‌ژمار كراوه‌ كه‌ به‌رهه‌مه‌كانی پڕفرۆشترینه‌.
دایلان، 12 جار خه‌ڵاتی گرامی به‌ده‌ستهێناوه‌، هه‌روه‌ها به‌هۆی گۆرانی "Things Have Changed” بۆ فیلمی "Wonder Boys"، له‌ ساڵی 2000دا، خه‌ڵاتی ئۆسكاری بۆ باشترین گۆرانی وه‌رگرت.
له‌ ساڵی 2012دا، له‌لایه‌ن سه‌رۆكی ئه‌مریكا، باراك ئۆباما-وه‌ خه‌ڵاتی ئازادیی پێبه‌خشرا.