لە رووداوێكی ھاتووچۆدا لەنێوان هەولێر-کۆیە ١١ كەس بوونە قوربانی

هەولێر ــ AA

لە رووداوێكی هاتووچۆ لەسەر رێگای هەولێر - کۆیە، ١١ كەس بوونە قوربانی.

نیوەڕۆی ئەمڕۆ هەینی لە نزیك دەربەندی گۆمەسپان لەسەر رێگای هەولێر-کۆیە، رووداوێكی هاتووچۆ لەنێوان سێ ئۆتۆمبێلدا روویدا.

بەپێی ئەو زانیارییانەی دەست ئاژانسی ئانادۆڵو کەوتوون، لە ئاکامی رووداوەکەدا چوار کەس گیانیان لەدەستداوه‌ و حەوتی دیکەیش برینداربوون.

هه‌ر به‌پێی زانیارییه‌كان، یەکێک لەوانەی گیانی لەدەستداوە فەرمانبەری وەزارەتی ئەوقاف و کاروباری ئایینییە بەناوی ئەحمەد عەزیز کە هاوکات وەرزشوان و ناوبژیوانی تۆپی پێی عێراق و کوردستان بوو و هاوسەر و منداڵێکیشی لەگەڵدابووە.

یەکێکی دیکە لەوانەی کە گیانیان لەدەستداوە یاریدەدەری پزیشک بووه‌ لە خاڵی پشکنینی دێگەڵە، بەناوی نەجات حەمەد.

دوای رووداوەکە قوربانییەکان گوازراونەتەوە بۆ نەخۆشخانەکانی هەولێر.