شاندێکی سەرۆکایەتیی ھەرێمی کوردستان سەردانی بنکەی لالشی کرد

ھەولێر ــ AA

شاندێکی سەرۆکایەتیی ھەرێمی کوردستان لەسەر راسپاردەی سەرۆکی ھەرێمی کوردستان، نێچیرڤان بارزانی بە سەرپەرشتیی سەرۆکی دەستەی راوێژکاران، جەعفەر ئێمنکی سەردانی پەرستگەی لالشی کرد و لەلایەن میری ئێزدییان لە کوردستان و جیھان و جڤاتی رۆحانیی، میر حازم تەحسین بەگ-ەوە پێشوازی کرا.

ماڵپەڕی سەرۆکایەتی ھەرێمی کوردستان بڵاوی کردەوە کە لە دیدارێکدا، بارودۆخی کوردانی ئێزدی و ئەو کێشانەی رووبەڕوویان دەبنەوە، بارودۆخی کەمپی ئاوارەکان، قۆناغ و ھەنگاوەکانی بەنێودەوڵەتیکردنی تاوانی جینۆساید، ھەروەھا شوێنبزرکردنی ئێزدییان لەلایەن تیرۆریستانی داعشەوە لە شنگال و ناوچەکانی دیکە، خرانە بەر باس و گفتوگۆ.

ئەوەیشی خستووەتەڕوو کە شاندەکە پاڵپشتیی سەرۆکی ھەرێمی کوردستان، نێچیرڤان بارزانی سەرۆکایەتیی ھەرێمی کوردستانی بۆ داخوازییەکانی خوشک و برایانی ئێزدی لە ھەموو روویەکەوە دووپات کردەوە.