Rewa Mahmood Hasan
12 تشرینی یەکەم 2020•نوێکردنەوە: 12 تشرینی یەکەم 2020
سلێمانی-AA
ئەمڕۆ ١٢ی تشرینی یەکەم، هەریەک لە پارێزگاری سلێمانی، قایمقامی قەزای مەڵبەندی سلێمانی، جێگری سەرۆکی ئەنجوومەنی پارێزگای سلێمانی، فەرمانگە پەیوەندیدارەکان، نوێنەری کۆمپانیا بەشدارەکان و رێکخراوی گەشەپێدانی مەدەنییەت، پڕۆژەی سەوزکردنی شاخی گۆیژەیان بەسەرکردەوە.
دوای ئەوەی بە هاوکاری چەند کۆمپانیا و رێکخراوێکی تایبەت و هەماهەنگی لەگەڵ یەکە ئیدارییە خۆجێییەکانی پارێزگای سلێمانی پرۆژەی سەوزکردنی چیای گۆیژە کەوتبوویە بواری جێبەجێکردنەوە، بەمەبەستی لە نزیکەوە ئاگاداربوون لە چۆنیەتی بەڕێوەچوونی هەڵمەتەکە هەریەک لە پارێزگاری سلێمانی، هەڤاڵ ئەبوبەکر و قایمقامی قەزای مەڵبەندی سلێمانی، ئاوات محەمەد و جێگری سەرۆکی ئەنجوومەنی پارێزگای سلێمانی و فەرمانگە پەیوەندیدارەکان و نوێنەری کۆمپانیا بەشدارەکان و ر ێکخراوی گەشەپێدانی مەدەنییەت، پڕۆژەی سەوزکردنی شاخی گۆیژەیان بەسەرکردەوە.
لە کۆنگرەیەکی ڕۆژنامەوانییدا پارێزگاری سلێمانی، هەڤاڵ ئەبوبەکر هەڵمەتی پاککردنەوەی شاخی گۆیژەی راگەیاند و داوای لەهەموو لایەک کرد خۆبەخشانە بەشداری لەم هەڵمەتە ژینگەییە مرۆییە نیشتیمانییەدا بکەن.
پارێزگاری سلێمانی سوپاسی قایمقامی قەزای مەڵبەندی سلێمانی و ئەنجوومەنی پارێزگای سلێمانی و هەموو فەرمانگە حکومیی و کۆمپانیا بەشدارەکانی کەرتی تایبەت و زانکۆ و رێکخراوەکانی کرد بەتایبەتی کۆمپانیاکانی (ئاسیاسێڵ، قەیوان، تانوپۆ، دەروازە، ماس و هەڵەبجە) و هەموو ئەوانەش کە ئامادەیی بەشداریکردنیان لەم پڕۆژە گەورەیەدا داوە کە بەشێوازێکی تەکنیکی و زانستی و هونەریی و ئەندازەیی و ژینگەیی نوێ کارەکانیان جێ بەجێ دەکەن.
پارێزگاری سلێمانی رایگەیاند لەبەرئەوەی تا ئێستا بوودجەی تایبەت بە ئاودانی هەواری شار و سەوزایی و بلوارەکانی سلێمانی خەرج نەکراوە، وەک ساڵانی رابردوو لە پێناوی پاراستنی سەوزایی شارەکەدا، پارێزگای سلێمانی پشتیوانی لە سەرۆکایەتی شارەوانیی سلێمانی و بەڕێوەبەرایەتی باخچەکانی سلێمانی دەکات بۆ ئاودان و پاراستنی سەوزاییەکانی سلێمانی تا کاتی باران بارین و دووبارە داوای لە حکوومەتی هەرێمی کوردستان کرد کە بوودجەی پێویست بۆ ئەم مەبەستە خەرج بکەن.
ئەمە لەکاتێکدایە کە بەپێی ماستەرپلانێکی پەسەندکراو بەشێوەی تابلۆیەکی سەوزایی، تەواوی شاخی گۆیژە سەوز دەکرێت و ناوچە سووتاوەکان دەبوژێنرێنەوە و سیستمی ئاو و ئاگر کوژێنەوە و خۆپارێزیان بۆ دادەنرێت.
