گردبوونەوەی زیندانیانی سیاسی لە سلێمانی

ژمارەیەك لە زیندانیانی سیاسی لە بەردەم مۆزەخانەی ئەمنە سورەكەی سلێمانی (ئەو جێگایەی لەسەردەمی ڕژێمی پێشووی عێراق لە پێش ساڵی 1991 دانیشتووانی شارەكەی تێیدا دەگیراو ئازار و ئەشكەنجە دەدران) كۆبوونەوە و گردبوونەوەیەكی ناڕەزاییان ئەنجامدا.

لەو گردبوونەوەیەدا ژمارەیەك گوتار و دەقی یاداشتێكی زیندانییەكانیان خوێندرایەوە كە ئاراستەی لیژنەی باڵای رووبەڕووبونەوەی قەیرانی دارایی هەرێمی كوردستانیان كردووە، تێیدا ئاماژەیان بەوە كردووە کە بەهۆی قەیرانی داراییەوە لە مانگی ئابی ساڵی رابردووەوە تا ئێستا تەنها دوو مینحەیان وەرگرتووە، دواکەوتنی مینحەکانیان کاریگەری کردووەتە سەر گوزەرانییان.
لە یاداشتەكەدا چەند داواكارییەك ئاراستەی لیژنەكەی حكوومەت كراوە و داوا دەكەن مینحەی زیندانیانی سیاسی و مووچەی شەهیدان و ئەنفالكراوان لەكاتی خۆیدا و لەیەك كاتدا دابەش بكرێت، هەروەها هەموو هەوڵێك بۆ كەمكردنەوە و بڕینی مینحەكانیان رەت دەكەنەوە، داواشیان كردووە كاری بەپەلە بكرێت بۆ پێدانی مینحەی وەجبەكانی مانگی نۆ تا مانگی 12ی ساڵی رابردوو، لە كۆتایشدا داوای هەمواركردنەوەی یاسای ژمارە 11ی ساڵی 2011ی پەرلەمانی كوردستان بۆ هاوتا كردنی بە یاسای ژمارە 4ی هەمواركراوی ساڵی 2009 ی عێراق تایبەت بە ماف و ئیمتیازاتی زیندانیانی سیاسی كردووە كە لە یاسا عێراقییەكەدا مووچە و مافی زیاتریان بۆ دابین كراوە.

ئەوان داوایان كردووە لە ماوەیەكی كەمدا داواكارییەكانیان بۆ جێبەجێ‌ بكەن، بەپێچەوانەوە وەك لە یاداشتەكەدا ئاماژەیان بۆ كردووە هەڕەشەی هەڵوێستی سیاسی و یاسایی توند و گواستنەوەی ناڕەزایی و خۆپیشاندانەكانیان بۆ شاری هەولێر دەكەن.

سەرپەرشتیاری گردبوونەوەكە سامان بەكر بە ئاژانسی ئانادۆڵوی راگەیاند: "وەك ژمارەیەك لە زیندانیانی سیاسی بەدوور لە حزب و گرووپ و رێكخراوەكان ئەم گردبوونەوەیەمان كردووە، بەرانبەر ئەو بەڵێنامەیەی حكومەت بە زیندانیانی پڕ دەكاتەوە كە دەیەوێت مینحەكانمان ببڕێت، ئەوەش لەلایەن ئێمەوە بە هەموو شێوەیەك رەت دەكەینەوە".

زیندانیانی سیاسی ئەو كەسانەی بەهۆكاری سیاسی لەلایەن رژێمی پێشوی عێراقەوە گیرابوون و رووبەڕووی ئازار و ئەشكەنجە بوونەوە، لەلایەن حكومەتی هەرێمەوە مینحەیەكی مانگانە بە بڕی 500 هەزار دیناریان بۆ دیاری كراوە، ژمارەی ئەو كەسانەشی ئەو مینحەیە وەردەگرن زیاتر لە پێنج هەزار كەسە.

سەرپەرشتیاری گردبوونەوەكە ئاماژەی بەوەش كرد، ئەم گردبوونەوەیەی ئەمڕۆیان سەرەتای كار و چالاكییەكانیانە و ئەگەر حكومەت وەڵامی داواکارییەکانیان نەداتەوە و دەست بۆ بڕینی مینحەكانیان ببات، هەڵوێستی تریان دەبێت و ناڕەزایەتییەكان فراوانتر دەكەن.