کۆنگرەی رۆژنامەوانی بەڕێوەبەری فەرمانگەی تەندروستی سلێمانی

سلێمانی ـ AA

بەڕێوەبەری فەرمانگەی تەندروستی سلێمانی، سەباح ھەورامی لە کۆنگرەکەیدا ئەو دەنگۆیانەی رەتکردەوە کە باس لە داخستنی نەخۆشخانەی فریاکەوتنی سلێمانی دەکەن، ئەو گوتی: "بە ھۆی کردنەوەی بەشی فریاکەوتنی نەخۆشخانەی شارەوە ئێستا لۆدێکی کەمتر لەسەر نەخۆشخانەی فریاکەوتن ھەیە و زۆربەی ئەو نەخۆشانەی کە پێویستیان بە چارەسەرکردنی خێرا ھەیە دەبرێنە نەخۆشخانەی شار کە دەکەوێتە دەرەوەی شەقامی شەستی، ئەوەش ھۆکاری خۆی ھەیە کە نەخۆشخانەیەکی نوێیە و ھاووڵاتییان ئاسانتر دەگەنە نەخۆشخانەکە، ھەروەھا ھەموو جۆری خزمەتگوزارییەکان پێشکەش بە نەخۆشەکان دەکرێت".

ئەو گوتی: "بەتەنھا لە ماوەی رۆژێکدا و لە نەخۆشخانەی فریاکەوتنی سلێمانی تەنھا دوو نەشتەرگەری ئەنجامدراوە لە کاتێکدا ٥٠ کارمەندی تەندروستی لە نەخۆشخانەکە ئامادەییان ھەبووە و ئەوەش نابەرامبەرییەک دروست دەکات، بۆیە لەسەر پێشنیازی پزیشکەکان کە پێشنیازیان کرد چەند خزمەتگوزارییەکی تر لەو سەنتەرە دابمەزرێت تاوەکو ئەو نابەرامبەرییە دروست نەبێت و ھاووڵاتییان زیاتر سوودی لێوەربگرن".

بەڕێوەبەری فەرمانگەی تەندروستی سلێمانی جارێکی تر لە کۆنگرەکەیدا ئەو دەنگۆیانەی رەتکردەوە کە نەخۆشخانەی فریاکەوتن کە دەکەوێتە سەنتەری شارەکەوە دابخرێت، ئەوەشی گوت "رەنگە جۆری خزمەتگوزارییەکان لەو نەخۆشخانەیە بگۆڕدرێت، بەڵام بەھیچ شێوەیەک ئەو نەخۆشخانەیە و ھیچ نەخۆشخانەیەکی تر داناخرێت".