٤٤ پسپۆری سەربازی بەریتانی گەیشتنە بنكەی عەین ئەسەد

ئەنبار ــ AA

فەرماندە لە حەشدی هۆزەكان، قەتەری عوبێدی رایگەیاند كە ٤٤ پسپۆری بەریتانی پووچەڵكردنەوەی مین و تەقەمەنییەکان، گەیشتنە بنكەی سەربازی عەین ئەسەد لە پارێزگای ئەنبار.

لە لێدوانێكدا بۆ ئاژانسی ئانادۆڵو، قەتەری عوبێدی گوتی: "٤٤ پسپۆری بەریتانی لە تیمی ئەندازیاری سوپای بەریتانیا بە فڕۆكەیەكی تایبەت لە شاری عەممانی پایتەختی ئوردنەوە گەیشتنە بنكەی عەین ئەسەد لە ناحیەی بەغدادی (٩٠ كیلۆمەتر رۆژئاوای رومادی) ناوەندی پارێزگای ئەنبار".

ژمارەیەك لە هێزەكانی هاوپەیمانێتی نێودەوڵەتی دژ بە داعش لە بنكەی عەین ئەسەد لە ناحیەی بەغدادی جێگر كراون.

ناوبراو ئاماژەی بەوەشدا كە ئەو ٤٤ پسپۆرە لە بوارەی پووچەڵكردنەوەی مین و تەقەمەنییەکاندا شارەزاییان هەیە و پێشبینی كرد كە لە ئۆپەراسیۆنی كۆنتڕۆڵكردنەوەی شارەكانی عانە، راوە و قائم بەشداری بكەن.

تا ئێستا وەزارەتی بەرگری عێراق و بەرپرسانی بەریتانیا هیچ روونكردنەوەیەكیان لە بارەی ئەوەی کە قەتەری عوبێدی باسی لێوە كرد، بڵاونەكردووەتەوە.