عەبادی: "رێگە نادەین لە رێگەی خاکی وڵاتەکەمان ھێرش بکرێتە سەر تورکیا"

بەغدا

سەرۆکوەزیرانی عێراق، حەیدەر عەبادی رایگەیاند کە رێگە نادەن لە رێگەی خاکی وڵاتەکەیەوە ھێرش بکرێتە سەر تورکیا.

عەبادی لە کۆنگرەی رۆژنامەوانی ھەفتانەی خۆی لە شاری بەغدای پایتەختی عێراق رایگەیاند کە سبەینێ سەردانی شاری ئەنقەرەی پایتەختی تورکیا دەکات و لەمبارەیەوەش چەند لێدوانێکی پێشکەش کرد.

عەبادی رایگەیاند کە گرنگی بە رێککەوتن لەگەڵ وڵاتلانی دیکە لەبارەی دابەشکردنی ئاو دەدەن و گوتیشی: "لە چوارچێوەی ئەو سەردانەی کە بۆ تورکیا ئەنجامی دەدەین، تاوتوێی پرسی ئاو،ئابووری، وەبەرھێنان و ئاسایش دەکەین. تورکیا وڵاتی دراوسێی ئێمەیە و رێگە نادەین لە رێگەی خاکی وڵاتەکەمانەوە ھێرش بکرێتە سەر ئەو شوێنە".

عەبادی باسی لە پاراستنی سنووری نێوان تورکیا و عێراق کرد و گوتی: "ھێزەکانمان راسپاردووە بەمەبەستی پاراستنی سنووری تورکیا و عێراق".

عەبادی لەبارەی رەخنەی چەند گرووپێکی شیعە مەزهەب بەرامبەر بە لێدوانەکانی لەبارەی بڕیاری سەپاندنی سزا لەلایەن ئەمریکاوە بەسەر ئێران گوتی: "ئێمە پێمانوایە کە ئەم سزایانە ستەمکارانەیە و دادپەروەرانە نییە. بەڵام بەرژەوەندی دەوڵەتی عێراق و گەلەکەی لە سەرووی ھەموو شتێکە و نایگۆڕینەوە بە بەرژەوەندی ھیچ گرووپێکی چەتە".

عەبادی راشیگەیاند کە دەنگۆییەکانی وەستاندنی پەیوندی بازرگانی وڵاتەکەی لەگەڵ ئێران و قەدەغەکردنی ھاووردەی کاڵا لەو وڵاتە دوورە لە راستییەوە، لەمبارەیەوە گوتی: "لە پەیوەندییە ئابوورییەکانمان لەگەڵ ئێران دراوی دۆلار بەکارناھێنین. بەڵام ئەمە مانای ئەوە نییە کە ئەم سزایانە جێبەجێ دەکەین".

سەرۆکوەزیرانی عێراق، حەیدەر عەبادی ئاشکراشی کرد کە بڕیاری داشکاندنی نرخی ڤیزا و خەرجییەکانی گومرک بۆ ئەو گەشتیارانە دەرکردووە کە لە چوارچێوەی گەشتوگوزاری ئاینی سەردانی عێراق دەکەن.

عەبادی دەنگۆییەکانی سەردانەکەی بۆ ئێران لە دوای ئەنقەرە رەتکردەوە.