جەبار یاوەر: "ھیچ بڕیارێک بۆ گەڕانەوەی پێشمەرگە بۆ کەرکووک نییە"

سلێمانی ـ AA

ئەمینداری گشتی وەزارەتی پێشمەرگەی حکوومەتی ھەرێمی کوردستان، جەبار یاوەر لە لێدوانێکیدا بۆ ئاژانسی ئانادۆڵو گوتی: "ئێمە و وەزارەتی بەرگری عێراق تائێستا ھیچ رێکەوتنێکی مۆرکراوامان لە نێواندا نییە و ھیچ بڕیارێک بۆ گەڕانەوەی پێشمەرگە (بۆ ناوچەناکۆکی لەسەرەکان بە کەرکووکەوە) نییە، ھەردوولامان لێکتێگەیشتنێکمان ھەیە لەگەڵ یەکدا کە پێویست دەکات ھەماھەنگ و ھاوکار بین و ئۆپەراسیۆنی ھاوبەش ھەبێت لە ناوچەکانی دیالە و سەڵاحەدین و کەرکووک و مەخموور و رۆژئاوا و رۆژھەڵاتی مووسڵ".

جەبار یاوەر گوتی: "لەبەر رۆشنایی ئەو لێکتێگەیشتنە ھاوبەشە سەرۆکایەتی ئەنجوومەنی فیدراڵی عێراق بە فەرمانێکی دیوانی عادل عەبدولمەھدی بڕیاریدا بە دامەزراندنی چەند لیژنەیەک تا لەگەڵ وەزارەتی پێشمەرگەی ھەرێم دەست بە گفتوگۆ بکەن و چۆنێتی کاری ھاوبەش دەست پێبکەینەوە، بۆ ئەو مەبەستەش لە وەزارەتی بەرگری لیژنەیەکی باڵا و پێنج لیژنەی ناوچەیی دروستکرابوو بۆ ئەو ناوچانە (ناوچە ناکۆکی لەسەرەکان)".

ئەمینداری گشتی وەزارەتی پێشمەرگە ئەوەشی گوت: "دوای گەیشتنی ئەو فەرمانە بە ئێمە و تاوتوێکردنی، ئێمەش لە وەزارەتی پێشمەرگە بڕیارماندا ھەمان ئەو لیژنانە دروست بکەین کە لیژنەیەکی باڵا و پێنج لیژنەی ناوچەییە وەک ئەوان، پێش دوو رۆژ یەکەم دانیشتنمان ئەنجامدا لە بەغدا و باسمان لە چۆنێتی داڕشتنی ئالیەت و میکانیزمی ھەماھەنگیمان کردووە کە ئەزموونی پێشترمان ھەیە پێکەوە و لە ساڵی ٢٠٠٩ تا ساڵی ٢٠١٤ بنکە و بازگە و ھێز و ئۆپەراسیۆنی ھاوبەشمان ھەبووە لە ھەموو ناوچەکانی دەرەوەی ئیدارەی ھەرێم کە ئەم لیژنانەش بۆ ئەو ناوچانەیە".

یاوەر لەبارەی دەرەنجامی ئەو کۆبوونەوەیەوە زیاتر گوتی: "پاش گفتوگۆیەکی زۆر دەربارەی ئەم بابەتانە بڕیارماندا ھەر پێنج لیژنەکەی ھەردوولا بۆ ناوچەکان لە ھەفتەی ئایندەوە دەست بە دانیشتن و تاوتوێکردنی ناوچەکانیان بکەن لەوەی چ ناوچەیەک پێویست دەکات ھێزی تێدا بێت و چ ناوچەیەک پێویست ناکات نە پێشمەرگە نە سوپای تێدا بێت، ھەروەھا چ ناوچەیەک پێویست دەکات ھێزی زیاتری تێدا بێت بەھۆی ھەڕەشەی داعشەوە، چاوەڕوان دەکەین ئەو لیژنانە تاوتوێی ھەموو ناوچەکانمان بۆ بکەن و پێشنیارەکانیان بخەنەوە بەردەست لیژنەی باڵا، ئەوکات ئێمەش لە لیژنەی باڵا بڕیاری خۆمانی لەسەر دەدەین و دەست بە کاری ھاوبەش دەکەینەوە".

ئەمینداری گشتی وەزارەتی پێشمەرگە باس لەوە دەکات، ئەمریکا و وڵاتانی ھاوپەیمان بەردەوام ھانی ھەردوولایان داوە کە پێکەوە کار بکەن و بوار بۆ چالاکی چەکدارانی داعش نەدەن لەو ناوچانە، بۆ ئەو مەبەستەش رۆڵی پشتیوانیان ھەیە لەنێوان ھەردوولادا.

بەرپرسەکەی وەزارەتی پێشمەرگەی ھەرێمی کوردستان لە بەشێکی تری لێدوانەکەیدا لە بارەی زیادبوونی چالاکییەکانی داعش لە چەند ناوچەیەکی عێراق دواو گوتی: "جموجوڵی داعش زیاد بووەتەوە و لە ماوەی ساڵێکدا بەدواداچوون دەکەین و ھەموویمان لە وەزارەتی پێشمەرگە تۆمارکردووە کە دەبینین رۆژ بەرۆژ جموجۆڵ و کردەی تیرۆریستیان زۆر زۆر ھەڵدەکشێت، بەتایبەت لە ناوچەکانی دیالە و خانەقین و جەلەولا و سەعدیە و خورماتوو لەگەڵ ناوچەکانی باشووری کەرکووک و رۆژئاوای شارەکە و قەرەچووخ و مەخموور و چەند ناوچەیەکی شرگات شانە نوستووەکانیان لە جموجۆڵدان".