ئیدلب.. كوژران و برینداربوونی ٤٥ مەدەنی

شاری ئیدلبی باكووری سووریا كە لە ژێر كۆنترۆڵی ئۆپۆزسیۆنە، بەچڕی لەلایەن فڕۆكەكانی جەنگی رووسیاوە بۆردومان كرا و بەهۆیەوە 15 كەسی سڤیل كوژران و زیاتر لە 30 کەسی دیكەش بریندار بوون.

سەرچاوەیەك لە بەرگری شارستانی كە نەیویست ناوی ئاشكرای بكرێت بۆ ئاژانسی ئانادۆڵو گوتی: "فڕۆكەكانی جەنگیی رووسیا، لە شاری ئیدلب، چەند گەڕەکێکیان كردە ئامانج و بەچڕی بۆردومانی شارەکەیان کرد".

بەگوتەی سەرچاوەكە، بەپێی ئاماری بەرایی كە دەستكەوتوون، لە ئاكامی بۆردومانەكە، 15 كەس كوژراون كە لە ناویاندا منداڵ هەیە و زیاتر لە 30 کەسی دیكەش بریندار بوون.

بەپێی گوتەی سەرچاوەکە، بەهۆی بۆردومانی فڕۆكەكانی جەنگیی رووسیاوە، خانوو و باڵەخانەكانەكانی نیشتەجێبوو و بارەگای رێكخراوی مانگی سووری عەرەبیی سووریا لە نێو شارەكە و هەروەها ژمارەیەك ئۆتۆمبێلیش وێران و خاپوور کراون.