یەکەم گەشتی ئاسمانیی لە ھۆڵەنداوە بۆ سووریا ئەنجامدرا

ئەمڕۆ پێنجشەممە، یەکەم گەشتیی ئاسمانیی لە فڕۆکەخانەی " ئەمستردام شیفۆڵ" لە ھۆڵەندا بۆ فڕۆکەخانەی نێودەوڵەتی دیمەشق لە سووریا ئەنجامدرا.

ساڵانێکی زۆر بوو، بەھۆی دۆخی ناوخۆی سووریا، گەشتە ئاسمانییەکان لە فڕۆکەخانەی " ئەمستردام شیفۆڵ" فڕۆکەخانەی نێودەوڵەتی دیمەشق ڕاگیرابوون.

ئاژانسی ھەواڵی فەرمیی سووریا "سانا" بڵاوی کردەوە کە ئەمڕۆ، یەکەم گشتی ئاسمانیی لەلایەن ھێڵی ئاسمانیی سووریا لە فڕۆکەخانەی " ئەمستردام شیفۆڵ" بۆ فڕۆکەخانەی نێودەوڵەتی دیمەشق ئەنجامدراوە.

ئاژانسەکە باسی لەوەشکردووە کە ئەو گەشتە ئاسمانییە لە چوارچێوەی پلانی دەستپێکردنەوە و فراوانکردنی گەشتە ئاسمانییەکانی ھاتن و چوون لە وڵاتانی ئەورووپا ئەنجامدراوە.

ھەروەھا لەئێستادا ئامادەکاری دەکرێت، بۆ ئەوەی لەسەرەتای مانگی ئابی ئەمساڵ، یەکەم گەشتیی ئاسمانیی لەنێوان بەرلین و دیمەشق ئەنجام بدرێت.