پیشەوەرێکی دەستڕەنگین شانە لە دار دروست دەکات

هەورامان – AA

محەمەد محەمەدی (٧٠ ساڵ) کە هاووڵاتییەکی دانیشتووی ناوچەی هەورامانە لە قەزای سەوڵاوا (سروئاباد) لە پارێزگای سنە لە ئێران، نزیکەی نیو سەدەیە شانە لە دار دروست دەکات.

وەستا محەمەدی ماوەی ٤٦ ساڵە خۆشەویستی بۆ پیشەکەی وایکردووە بێزار نەبێت و سەلیقەی لە کارەکانیدا ڕەنگی داوەتەوە.

لە نێو دوکانێکی بچووکی ناوچەی هەورامان، وەستا محەمەد ڕۆژانە کاتەکانی بە دروستکردنی شانە بەسەر دەبات و، بەو شێوەیە بژێوی ژیانی خۆی و خێزانەکەی پەیدا دەکات.

شانە ئامرازێکی قژداهێنانە کە ژمارەیەک ددانەڕێی هەیە و بۆ داهێنانی قژ و سمێڵ بەکاردەهێندرێت، تا ئێستاش وەستا محەمەد بەشێوازە نەریتییەکەی دروستیان دەکات.

وەستا محەمەد ناوبەناو دەچێت بۆ شاخ بۆ کۆکردنەوەی ئەو دارەی لە دروستکردنی ئەو شانانەدا بەکاریان دەهێنێت، سەرەڕای سەختی کارەکەی مەترسیش لەسەر ژیانی هەیە کە وەک خۆی باسی دەکات چەند جارێک لە دار کەوتووەتە خوارەوە و بریندار بووە.

تیمی ئاژانسی ئانادۆڵو سەردانی وەستا محەمەدی کرد لە دوکانەکەی و، دیمانەیەکی لەگەڵ ساز کرد.

وەستا محەمەد بۆ ئاژانسی ئانادۆڵو باسی لە سەرەتای دەستپێکی کارەکەی و چۆنییەتی فێربوونی کرد و، گوتی: ''دوو ساڵ دوای شۆڕشی ئێران، وەستایەک لە هەورامان دەستی بە کاری دارتاشی کرد، منیش وەک شاگرد کارم بۆی دەکرد، دوای کۆچی دوایی وەستاکەم خۆم بووم بە وەستا و، ئەوە نزیکەی ٤٦ ساڵە ئەم کارە دەکەم و، چەند جۆرێک شانەی دار دروست دەکەم''.

وەستا محەمەد بەدەم کارەکەیەوە کە بە کەرستە سادەکانەوە ئەنجامی دەدات، بەو پارچە دارانەی لە دروستکردنی شانەدا دەمێنێتەوە زوو زوو زۆبا دارەکەی گەرم دەکات.

لە دوکانە بچووکەکەیدا وەستا محەمەد تابلۆیەکی هەڵواسیووە کە بە خەتێکی جوان لێی نووسراوە ''خودا لە بیر مەکە''، ئەو نووسراوەیش بووەتە جێی سەرنجی ئەو کەسانەی سەردانی دەکەن و، خۆیشی بە سەردانکاران دەڵێت ''خودا لە بیر مەکە، خوداش تۆ لەبیر ناکات''.

لێهاتوویی وەستا محەمەد وایکردووە داهێنان لە کارەکەیدا بکات، لەمبارەیەوەش گوتی: ''ڕۆژانە ٢٠ شانە دروست دەکەم، ناو بەناو کەرستەی دیکەش لە دارەکان دروست دەکەم، بەڵام کاری سەرەکیم شانە دروستکردنە، زیاتریش لە وەرزی زستان ئیش دەکەم''.

لە ڕۆژانی پشوودا گەشتیاران سەردانی دوکانەکەی وەستا محەمەد دەکەن، ڕۆژانی ئاساییش وەستا محەمەد خۆی شانەکانی دەبات بۆ ناوچەکانی دیکە و دەیانفرۆشێت، وەک خۆی دەڵێت: ''شانەی گەورە بە ١٠ هەزار تمەن و بچووکیش بە پێنج هەزار تمەن دەفرۆشم، بەو شێوەیە بژێوی ژیانی خێزانەکەم دابین دەکەم''.

سەبارەت بەو جۆرە دارەی لە کارەکەیدا بەکاری دەهێنێت، وەستا محەمەد ڕایگەیاند: ''جار جارە دەچم بۆ شاخ بۆ هێنانی دار. دەبێت دارەکە وشک بێت و تەڕ نەبێت، تەنیا یەک جۆر دار بۆ شانە دەبێت و پێی دەڵێن داری کەکەو یان کێکف، (جۆرە دارێکی کوێستانییە و بۆ کاری دارتاشی سوودی لێ وەردەگیرێت)''.

هاووڵاتیان و گەشتیاران سەرسامن بە کارەکەی وەستا محەمەد، لەگەڵ ئەوەی شانەی لێدەکڕن وێنەشی لەگەڵ دەگرن.

ئەمیر حوسەین، کە گەشتیارێکی گەنجە و لە تارانەوە لەگەڵ هاوڕێکانی بە شێوەی گرووپ سەردانی هەورامانیان کردووە، دوای ئەوەی شانەیەکی لە وەستا محەمەد کڕی، بەدەم شانەکردنی سمێڵیەوە گوتی: ''جگە لەوەی ئەم شانانە کارێکی زۆر نایابن، بە ڕاستی وەستا زەحمەتی زۆریشی پێوە دەکێشێت''.