وەزارەتی دەرەوەی تورکیا: "هێرشی زەمینی ئیسرائیل بۆ سەر لوبنان داگیرکارییەکی نایاساییە"

ئەنقەرە - AA

وەزارەتی دەرەوەی تورکیا ڕایگەیاند: "هێرشی زەمینی ئیسرائیل بۆ سەر لوبنان بە واتای پێشێلکردنی سەروەری و یەکپارچەیی خاکی ئەو وڵاتەیە و داگیرکارییەکی نایاساییە".

وەزارەتی دەرەوەی تورکیا لەبارەی هێرشی زەمینی ئیسرائیل بۆ سەر لوبنان ڕاگەیاندراوێکی بڵاو کردەوە.

لە ڕاگەیاندراوەکەی وەزارەتدا هاتووە، "دەستپێکی هێرشی زەمینی ئیسرائیل بۆ سەر لوبنان بە واتای پێشێلکردنی سەروەری و یەکپارچەیی خاکی ئەو وڵاتەیە و داگیرکارییەکی نایاساییە. پێویستە ئەم هێرشە دەستبەجێ ڕابگیرێت و سەربازانی ئیسرائیلی لە خاکی لوبنان بکشێنەوە".

لە ڕاگەیاندراوەکەدا وێڕای هۆشداریدان لەبارەی ئەوەی کە، "هێرشەکە نەک تەنیا کاریگەری لەسەر ئاسایش و سەقامگیری وڵاتانی ناوچەکە بەڵکو لەسەر وڵاتانی دیکەش دەبێت"، هاتووە: "ئەو هێرشە دەبێتە هۆی شەپۆلێک لە کۆچ و پێدانی دەرفەت بە توندڕەوەکان لەسەر ئاستی جیهانی بۆ بەهێزبوونیان. لەم دۆخەدا نابێت پشتیوانیکارانی ئیسرائیل و دابینکەرانی چەک بۆ ئەو وڵاتەش فەرامۆش بکەین".

وەزارەتی دەرەوەی تورکیا جەختیشی لەوە کردووەتەوە کە پێویستە ئەنجوومەنی ئاسایشی سەر بە نەتەوە یەکگرتووەکان ڕۆڵی خۆی ببینێت و ڕێکاری پێویست بۆ ڕێگریکردن لە داگیرکردنی لوبنان لە لایەن ئیسرائیلەوە ببینێت و هاتووە، "ئەوە گورزێکە لە یاسای نێودەوڵەتی و نەتەوە یەکگرتووەکان".

جەخت لەوەش کراوەتەوە کە بۆ ئارامی ناوچەکە، دەستبەجێ ئاگربەستێکی هەمیشەیی لە غەززە پێویستە و وەبیریشی هێناوەتەوە کە بەدیهێنانی ئاشتی لە غەززە بەرپرسیارێتی هەموو مرۆڤایەتییە.