نوێنەرێکی خامنەیی هێرش دەکاتە سەر یەکێتیی ئەورووپا

لەمیانی گوتاری هەینیدا نوێنەری رابەری ئێران، ئایەتوڵڵا عەلی خامنەیی لە پارێزگای ئازەربایجانی رۆژهەڵات بەناوی ئایەتوڵڵا موحسین شەبیستەری کردنەوەی نوێنەرایەتی یەکێتیی ئەورووپای لەناو ئێراندا بە مەترسی لەقەڵەم دا و رایگەیاند کە ناوەندەکە دەکەنە لانەی سیخوڕیکردن و دووپاتیشی کردەوە کە کردنەوەی ئەو نوینەرایەتیە زیان بە بەرژەوەندیەکانی کۆمەڵگەی موسڵمانان دەگەیەنێت.

شەبیستەری گوتی: "کردنەوەی ئۆفیسی یەکێتیی ئەورووپا لە تاران سوود بە بەرژەوەندیەکانی کۆمەڵگەی موسڵمانان ناگەیەنێت و بەبیانووی پاراستنی مافەکانی مرۆڤ، لایەنی ئۆپۆزسیۆنی رژێم و ئەوانەی دژی شەریعەتی ئیسلامن پشتگیریان لێ دەکرێت.

شەبیستەری ئاماژەی بەوەدا کە وڵاتانی ئەورووپا لە ئێران خاوەنی ئەرکی دیپلۆماتین و نابێت سەرکۆمار، حەسەن روحانی رێگە بە کردنەوەی ئۆفیسەکە بدات.