مەکسیک.. بەهۆی گەردەلوولەوە ٤٨ کەس گیانیان لەدەستدا

ژمارەی ئەو کەسانەی کە لەئەنجامی رۆچوونی زەوی بەهۆی گەردەلوولی ئێڕڵی کەمەرەییەوە لە هەردوو ویلایەتی پیوبڵا و ڤێراکروزی مەکسیک گیانیان لەدەستداوە بۆ ٤٨ کەس بەرزبوویەوە.

حاکمی ویلایەتی پیوبڵا، رافائێل مۆرێنۆ ڤاڵێ رایگەیاند کە تەرمی نۆ کەسی دیکە دۆزراونەتەوە و لەئیستادا ژمارەی ئەو کەسانەی گیانیان لەدەستداوە بۆ ٤٨ کەس بەرزبووەتەوە.

هاوکات حاکمی ویلایەتی ڤێراکروز، خافێر دوارتێ لە روونکردنەوەیەکی رۆژنامەوانییدا ئاماژەی بەوەکرد حکوومەتی خۆجێیی توانیویەتی ئاستی ئاوی ئەو رووبارانە کۆنترۆڵ بکات کە لەئاستێکی مەترسیداردا بوون و زیاتر لە هەزار و ٢٣٠ کەسیشی بۆ ناوچە ئارامەکان گواستووەتەوە.

لەلایەکی دیکەوە و لە نیمچەدوورگەی باخا کالیفۆرنیا باکووری خۆرئاوای مەکسیک، گەردەلوولێکی نوێ بەناوی ''خافێر'' دەستیپێکردووە و کاریگەرییەکانی بینراوە.