لێدوانی نوێی ترەمپ لەبارەی سزاکانی سەر ئێران

واشنتۆن - AA

سەرۆکی ئەمریکا، دۆناڵد ترەمپ رایگەیاند کە سزاکانی سەر بازرگانی نەوتی ئێران لەسەر بنەمای خشتەی کات جێبەجێ دەکەن و نایانەوێ نرخی نەوت لە جیھان بەرز ببێتەوە.

ترەمپ لە باخچەی کۆشکی سپی لەبارەی سزاکانی سەر ئێران رایگەیاند کە سزاکانی سەر ئێران و پرسی ھەناردەکردنی نەوتی ئێران دوو پرسی لێک جیان.

ترەمپ گوتیشی: "(لە بەرامبەر ئێران)، تا ئەمڕۆ بەھێزترین سزامان سەپاندووە، بەڵام لە پرسی نەوت دەمانەوێ بە ھێواشی ھەنگاو بنێین، نامەوێ نرخی نەوتی جیھانی بەرز ببێتەوە".

ترەمپ لە درێژەی گوتەکانیدا لەبارەی بازرگانی نەوتی ئێران گوتی: "ئەمە پەیوەندی بە ئێرانەوە نییە، دەتوانن دەستبەجێ ھاووردەی نەوتی ئێران بگەیەنمە سەر سفر بەڵام ئەمە دەبێتە ھۆی شۆکێک لە بازاڕەکان. نامەوێ نرخی نەوتی جیھانی بەرز ببێتەوە".

گەڕی دووەمی سزاکانی سەر ئێران ئەمڕۆ خرایە بواری جێبەجێکردنەوە و وەزیری دەرەوەی ئەمریکا، مایک پۆمپیۆ رایگەیاندبوو کە ئەمریکا لە چوارچێوەی پاکێجی سەپاندنی سزاکان بەسەر ئێراندا، ھەشت وڵات لە بازرگانیکردن بە نەوت لەگەڵ ئەو وڵاتە دەبەخشێت کە تورکیاش لەنێو ئەو وڵاتانەدایە.

پۆمپیۆ رایگەیاندبوو کە تورکیا، چین، ھیندستان، ئیتاڵیا، یۆنان، ژاپۆن، کۆریای باشوور و تایوان بە شێوەیەکی کاتی لە سزاکانی سەر ئێران بەخشێنراون.