سەرکۆماری ئێران: "هێرشەکەی شیراز بە هیچ شێوەیەک بێ وەڵام نامێنێتەوە"

تاران - AA

سەرکۆماری ئێران، ئیبراهیم رەئیسی دەربارەی ئەو هێرشەی لە شاری شیراز سەربە پارێزگای فارس، کرایە سەر مەرقەدی شا چراغ، رایگەیاند: "وەڵامێکی وای پلانداڕێژەرانی هێرشەکە دەدەینەوە کە ببێتە وانەیەکی باش بۆیان".

ئاژانسی هەواڵیی فەرمی ئێران لە هەواڵێکدا ئەوەی خستووەتەڕوو کە سەرکۆماری ئێران، ئیبراهیم رەئیسی راگەیەندراوێکی دەربارەی کوژراو و بریندارەکانی مەرقەدی شا چراغ، بڵاوکردووەتەوە.

رەئیسی لە راگەیەندراوەکەیدا ئەوەی خستووەتەڕوو کە هێرشەکەی سەر مەرقەدی شا چراغ "بەهیچ جۆرێک بێ وەڵام نامێنێتەوە" و هێزە ئەمنییەکان، ئەنجامدەرانی رووداوەکە ئاشکرا دەکەن و وەڵامێکی وای پلانداڕێژەرانی هێرشەکە دەدەنەوە کە ببێتە وانەیەکی باش بۆیان.

سەرکۆماری ئێران، ئەوەشی خستووەتەڕوو کە "ئەم هێرشە بووە بەشێک لە لیستی هێرشەکانی دوژمنانی شۆڕشی ئیسلامی ئێران، پرسە و هاوخەمی خۆم ئاڕاستەی خێزانی کوژراو و بریندارەکانی مەرقەدی شا چراغ و هەموو گەلی ئێران، دەکەم".

پارێزگاری فارس، محەمەد هادی ئیمانییە ئەوەی ئاشکرا کردبوو کە لە هێرشەکەی سەر مەرقەدی شا چراغدا، ١٣ کەس گیانیان لەدەستداوە و ٢٣ کەسی دیکەش برینداربوون.

لە لایەکی دیکەشەوە رێکخراوی تیرۆریستیی داعش لە بەناو ئاژانسی هەواڵیی خۆیدا، بەرپرسیارییەتی ئەنجامدانی هێرشەکەی گرتە ئەستۆ.