سه‌رۆكی رووسیا و سه‌ركۆماری ئازه‌ربایجان له‌ سۆچی كۆبوونه‌وه

مۆسکۆ – AA

سەرۆکی رووسیا، ڤلادیمیر پوتین و سەرکۆماری ئازەربایجان، ئیلھام عەلیێڤ لە شاری سۆچی کۆبوونەوە.

لە کۆبوونەوەکەدا تاوتوێی پەیوەندییە سیاسی و بازرگانییەکانی نێوان ھەردوو وڵات و پێشھاتەکانی ناوچەکە و رەوشی قەرەباغ کرا.

پوتین بە تیشک خستنە سەر کێشەی قەرەباغ لەنێوان ئازەربایجان و ئەرمینیا گوتی: "ھێزی ئاشتیپارێزی رووسیا لە ناوچەکە (قەرەباغ) رۆڵێکی باشی ھەیە. خاڵە چاودێرییە ھاوبەشەکانی تورکیا و رووسیا چالاکانە کار دەکەن. بەڵام دیسانەوە ھەندێک رووداوی نەخوازراو لەو ناوچەیە روو دەدەن".

ئیلھام عەلییێڤ-یش بە تیشک خستنە سەر ئەوەی کە ماوەی ساڵێکە ئەو ناوچەیەی لەژێر چاودێری ھێزی ئاشتیپارێزی رووسیادایە پێکدادانی توند رووی نەداوە، بەڵام رووداوگەلێکی بچووک کە نەبوونەتە ھۆی کێشەی گەورە لەوێ روویداون.