رێكخراوێك تاوانه‌كانی دژ به‌ كاكه‌ییه‌كان به‌به‌ڵگه‌نامه‌ ده‌كات

هه‌ولێر - AA

پڕۆژه‌كه‌ به‌پێی قسه‌كانی سه‌رۆكی ئه‌و رێكخراوه‌ بێت له‌لایه‌ن چه‌ند گه‌نجێكی كاكه‌یی به‌ڕێوه‌ده‌برێت و خۆبه‌خشانه‌ به‌ ئه‌نجامی ده‌گه‌یه‌نن.

سه‌رۆكی رێكخراوی چرا بۆ به‌ به‌ڵگه‌نامه‌كردن له‌ لێدوانێكدا بۆ ئاژانسی ئانادۆڵو رایده‌گه‌یه‌نێت به‌نیازن قوربانیانی كاكه‌یی له‌سه‌رجه‌م ئه‌و ناوچانه‌ی كه‌ كاكه‌ییه‌كانی عێراقی لێ نیشته‌جێیه‌ سه‌رژمێری بكه‌ن و هه‌روه‌ها زه‌ره‌ر و زیانه‌كانیشیان تۆماربكه‌ن، فه‌رهاد كاكه‌یی له‌وباره‌یه‌وه‌ ئاشكرایكرد "ئێمه‌ وه‌كو كۆمه‌ڵێك گه‌نجی خۆبه‌خشی كاكه‌یی پڕۆژه‌یه‌كمان له‌به‌رده‌ستدا هه‌یه‌ بۆ كۆكردنه‌وه‌ و ئاماده‌كردنی داتا و زانیارییه‌كان له‌سه‌ر هه‌موو قوربانییانی كاكه‌ییه‌كان و زیانه‌كانییان له‌ عێراق، له‌و پڕۆژه‌یه‌دا دێ و ناوچه‌كانی نیشته‌جێ بوونی كاكه‌یی تۆمارده‌كه‌ین ئه‌وانه‌ی وێران بوون یان زیانییان پێگه‌یشتووه‌، هه‌روه‌ها بۆ ئه‌وه‌ی بزانین چه‌ند كه‌س شه‌هید بوون، كاكه‌ییەکان چه‌ند زیانییان پێگه‌یشتووه‌، چه‌ند خانوو و شوێنی دیكه‌ رووخاون و هه‌روه‌ها چه‌ند كه‌س بزربوون".

ئه‌و باسی له‌وه‌شكرد كه‌ پڕۆژه‌كه‌یان به‌ته‌نها تۆماركردنی ئه‌و پێشێلكارییانه‌ ناگرێته‌وه‌ كه‌ دژی كاكه‌ییه‌كان له‌لایه‌ن گرووپه‌ توندڕه‌وه‌كانی وه‌كو داعش و قاعیده‌وه‌ ئه‌نجامدراون به‌ته‌نها، به‌ڵكو ئه‌و زیاتر روونی ده‌كاته‌وه‌ "ئه‌م كۆكردنه‌وه‌ و ئاماده‌كردنی زانیارییانه‌ له‌سه‌ر ئه‌و تاوانانه‌ی ده‌رهه‌ق به‌ پێكهاته‌ی كاكه‌یی كراون به‌ته‌نها ئه‌و تاوانانه‌ ناگرێته‌وه‌ كه‌ رێكخراوی داعش دژی رۆڵه‌كانی كاكه‌یی به‌ئه‌نجامی گه‌یاندووه‌، به‌ڵكو تاوانه‌كانی رێكخراوی پێش ئه‌ویش كه‌ قاعیده‌ بوو و له‌دوای ساڵی 2003ه‌وه‌ دروست بوو، هه‌روه‌ها گرووپه‌كانی دیكه‌ش ده‌گرێته‌وه‌، جگه‌ له‌مانه‌ش ئێمه‌ ئه‌و تاوانانه‌ش تۆمار و به‌ به‌ڵگه‌نامه‌ده‌كه‌ین كه‌ له‌سه‌رده‌می پێشوو واته‌ له‌سه‌رده‌می سه‌دام و به‌دیاریكراوی له‌ هه‌ڵمه‌ته‌كانی ئه‌نفال دژ به‌ كاكه‌یی ئه‌نجامدراون".

گوتیشی" ئێمه‌ هه‌موو زانیارییه‌كان به‌ ئامار و ژماره‌ كۆده‌كه‌ینه‌وه‌، ئه‌مه‌ پڕۆسه‌یه‌كی دوور و درێژه‌ و ماوه‌یه‌كی زۆری ده‌وێت، ئێستا هه‌ندێك زانیاری و داتامان كۆكردووه‌ته‌وه‌، به‌ڵام ژماره‌ی كۆتایی نیین، بۆیه‌ هه‌ر داتایه‌ك بڵێین ته‌واو نابێت، ده‌بێت چاوه‌ڕوانی ته‌واوبوونی پڕۆسه‌كه‌ بین بۆ ئه‌وه‌ی زانیارییه‌كانمان ورد و ته‌واوبن، به‌ ئومێدین به‌مزووانه‌ بگه‌ین به‌ ئاماره‌ كۆتاییه‌كان".

سه‌باره‌ت به‌ تاوانه‌كانی رێكخراوی داعش دژ به‌ كاكه‌ییه‌كان فه‌رهاد كاكه‌یی كه‌ هاوكات مامۆستای زانكۆشه‌ له‌درێژه‌ی قسه‌كانیدا بۆ ئاژانسی ئانادۆڵو روونی كرده‌وه‌ "ئێمه‌ وه‌كو كاكه‌ییه‌كان رۆڵه‌مان هه‌یه‌ له‌لایه‌ن داعشه‌وه‌ سه‌ربڕاوه‌، هه‌مانه‌ هێشتا له‌لای داعشن و چاره‌نووسیان دیار نییه‌، بۆیه‌ هه‌رچییه‌كیش بڵێین له‌سه‌ر چاره‌نووسی ئه‌وان باش نابێت".

ده‌رباره‌ی ئه‌گه‌ری رفاندنی كاكه‌ییه‌كان و بردنییان بۆ سووریا له‌لایه‌ن داعشه‌وه‌ سه‌رۆكی رێكخراوی چرا بۆ به‌ به‌ڵگه‌نامه‌كردن رایگه‌یاند "هیچ حاڵه‌تێكی له‌و جۆره‌مان نییه‌ كه‌ كاكه‌یی له‌لایه‌ن داعشه‌وه‌ برابێت بۆ ناوچه‌كانی ژێر ده‌سه‌ڵاتی داعش له‌ سووریا".

له‌باره‌ی هه‌وڵه‌كانیشیان بۆ جێگیركردنی مافه‌كانییان و چه‌سپاندنی مافه‌كانییان له‌ عێراق و هه‌رێمی كوردستان، ناوبراو گوتی له‌گه‌ڵ حكوومه‌تی عێراق و هه‌رێمی كوردستان و رێكخراوه‌ نێوده‌وڵه‌تییه‌كانیش له‌كاركردنی به‌رده‌وامدان بۆ چه‌سپاندنی مافه‌كانییان، گوتیشی "هه‌وڵده‌ده‌ین هه‌موومان یه‌كسان بین وه‌كو پێكهاته‌كان به‌بێ جیاوازی، كاكه‌یی، كریستیان، ئێزدی، شه‌به‌ك، موسوڵمان و ئه‌وانی دیكه‌ش، ئه‌رك و مافه‌كانمان دیاری بێت و جێبه‌جێ بكرێت".

له‌باره‌ی كۆچكردنی هاووڵاتییانی كاكه‌یی بۆ ده‌ره‌وه‌ی عێراق، سه‌رۆكی رێكخراوی چرا بۆ به‌ به‌ڵگه‌نامه‌كردن فه‌رهاد كاكه‌یی له‌درێژه‌ی قسه‌كانیدا بۆ ئانادۆڵو روونی كرده‌وه‌" چوونه‌ ده‌ره‌وه‌ له‌ عێراق بۆ ده‌ره‌وه‌ هه‌موو پێكهاته‌ و ئاینه‌كانی گرتووه‌ته‌وه‌، موسوڵمان، كریستیان و كاكه‌یی و پێكهاته‌ی دیكه‌، بۆیه‌ هاوشێوه‌ی ئه‌وانی دیكه‌ش ئێمه‌ش رۆڵه‌كانمان ده‌چنه‌ ده‌ره‌وه‌".

گوتیشی" ئێستا ژماره‌ی كاكه‌ییه‌كان له‌ عێراقدا له‌سه‌رووی 200 هه‌زار كه‌س ده‌بین به‌پێی خه‌مڵاندنه‌كان، چونكه‌ ئاماری ته‌واو له‌به‌رده‌ستدا نییه‌، پێش ساڵی 2003 ژماره‌مان زیاتر بوو له‌وه‌ی ئێستا هه‌یه‌".

له‌كۆتایی قسه‌كانیدا كاكه‌یی باسی له‌وه‌شكرد كه‌ ئه‌و پڕۆژه‌یه‌یان گرنگیی تایبه‌تی خۆی هه‌یه‌، به‌تایبه‌ت چونكه‌ ئاماره‌كان زمانی روونترن و گوتیشی زانیارییه‌كان ده‌ده‌نه‌ لایه‌نه‌ ره‌سمییه‌كان و رێكخراوه‌ نێوده‌وڵه‌تییه‌كانیش.