روونکردنەوەی ناتۆ لەبارەی تورکیا

برۆکسل - AA

سکرتێری گشتی ناتۆ یانس ستولتنبەرگ ئاماژەی بەوە دا کە تورکیا مافی خۆیەتی بەرگری لە خۆی بکات و دادگایی ئەوانە بکات کە لە پشت ھەوڵی کودەتاکە بوون، بەڵام پێویستە لەسەر بنەمای سەروەری یاسایی ئەو کارانە ئەنجام بدرێت و راشیگەیاند لەوبارەیەوە خۆشحاڵی لەبارەی دروستکردنی پەیوەندی نێوان ئەنقەرە و ئەنجوومەنی ئەورووپا دەربڕی.

وەزیرانی دەرەوەی وڵاتانی ئەندام لە ناتۆ لە بارەگای گشتی ناتۆ لە برۆکسل کۆبوونەوە و دواتر ستولتنبەرگ لێدوانێکی پێشکەش بە رۆژنامەوانان کرد.

سکرتێری گشتی ناتۆ روونی کردەوە کە لە کۆبوونەوەکەدا تاوتوێی رۆڵی ناتۆ لە بەرەنگاربوونەوەی تیرۆر دەکرێت و گوتیشی: "ھەفتەی رابردوو لە ھێرشەکەی لەندەن، قوربانی و برینداری ١١ وڵاتی جیاوازی لێکەوتەوە. ئەمە یەکێک بوو لەو ھێرشانەی کە لەم مانگانەی دواییدا کرایە سەر ھاوپەیمانەکانمان. ھێرشەکە کراوەتە سەر ھەموومان کە ئەوەمانی وەبيرھێناینەوە پێویستە ھەوڵەکانمان خێرا بکەین".

ستولتنبەرگ ئاماژەی بەوەش دا کە ناتۆ ھاوکارییەکانی بۆ دەستەبەرکردنی سەقامگیری ناوچەکە بەردەوام دەبێت و راشیگەیاند پشتیوانی لە ھاوبەشەکانیان لە ئەفغاسنتان، باڵکانەکان و دەریای ئیجە دەکەن.

سکرتێری گشتی ناتۆ جەختی لەوەش کردەوە کە باشترین شێوازی بەرەنگاربوونەوەی تیرۆر، مەشق پێکردنی ھێزە ناوخۆییەکانە و راشیگەیاند لەو چوارچێوەیەدا ناتۆ مەشقی پووچەڵکردنەوەی بۆمبی بە ھێزەکانی عێراق کردووە.

ناوبراو لە کۆتایی قسەکانیدا گوتیشی: "ناتۆ لەسەر ھەندێک بنەماکانی وەک دیموکراسی، سەروەری یاسا و ئازادی تاکەکەسی دامەزراوە. بەھۆی ئەوەی بایەخێکی زۆر بەم بەھایانە دەدەین، زۆر جەختم لەسەری کردووەتەوە. لە ھەمان کاتدا پێویستە لە تورکیا تێ بگەین کە بەھۆی توندوتیژی و گرژییەکانی عێراق و سووریا زۆرترین کاریگەری لەسەر دروست بووە. زۆر جار رووبەڕووی ھێرشی تیرۆریستی بوونەوە. رووبەڕووی ھەوڵی کودەتایەک بوونەوە کە بووە ھۆی کوژرانی سەدان مرۆڤ. کاتێک پەرلەمانتارەکان لە ناوەوەی پەرلەمان بوون، پەرلەمانیان بۆردومان کرد. ھەڵبەتە تورکیا مافی خۆیەتی بەرگری لە خۆی بکات و دادگایی ئەوانە بکات کە لە پشت ھەوڵی کودەتاکە بوون، بەڵام پێویستە لەسەر بنەمای سەروەری یاسایی ئەو کارانە ئەنجام بدرێت. لەوبارەیەوە خۆشحاڵی لەبارەی پەیوەندی نێوان ئەنقەرە و ئەنجوومەنی ئەورووپا دەردەبڕم. چونکە ئەنجوومەنی ئەورووپا کە تورکیاش ئەندامێکە لێ، دەمەزراوەیەکی ئەورووپایە کە بەرپرسیارێتی لەسەر رێککەوتننامەی مافی مرۆڤی ئەورووپا لەسەرە. بۆیە خۆشحاڵم بە دروستکردنی دیالۆگ بەشێوەیەکی راستەوخۆ لە نێوان ئەنجوومەنی ئەورووپا و تورکیا بۆ تاوتوێکردنی کێشەکان".