"ترەمپ لەبارەی سزاکانی سەر ئێران بڕیارێکی بوێرانەی داوە"

قودس - AA

سەرۆکوەزیرانی ئیسرائیل، بونیامین ناتانیاھۆ رایگەیاند کە ئەمریکا لەبارەی سزاکانی بۆ سەر ئێران، "بڕیارێکی بوێرانەی داوە".

ناتانیاھۆ لە کۆبوونەوەی گرووپی پارتەکەی سوپاسی سەرۆکی ئەمریکا، دۆناڵد ترەمپی کرد بەھۆی دەستپێکردنی قۆناغی دووەمی سزاکانی سەر ئێران.

ناتانیاھۆ لەبارەی دەستپێکردنی سزاکانی سەر ئێران لەلایەن ئەمریکاوە رایگەیاند کە ئەمە رۆژێکی مێژووییە و گوتیشی: "جارێکی دیکە دەمەوێ سوپاسی سەرۆکی ئەمریکا، دۆناڵد ترەمپ بکەم بەھۆی ئەو بڕیارە گرنگ و بوێرانەیە. لەم باوەڕە دام کە ئەم بڕیارە سوودی زۆری دەبێت بۆ دەستەبەرکردنی سەقامگیری و ئاشتی و ئاسایش".

لەلایەکی دیکەش وەزیری بەرگری ئیسرائیل، ئەڤیگدۆر لیبەرمان لە ھەژماری تایبەتی خۆی لە تۆڕی کۆمەڵایەتی تویتەر بەھۆی دەستپێکردتی سزاکانی سەر ئێران سوپاسی ترەمپی کرد و گوتی: "ئەمریکا بە یەک جوڵە گورزی لە پرسی جێگیربوونی ئێران لە سووریا، لوبنان، غەززە، عێراق و یەمەن وەشاند".

لەلایەکی دیکەش وەزیری دەرەوەی ئەمریکا، مایک پۆمپیۆ لە کۆتایی ھەفتەی رابردوو لە ھەژماری تایبەتی خۆی لە تۆڕی کۆمەڵایەتی راگەیاند کە لە سەپاندنی سزاکان ، ئیدارەی ئێران کراوەتە ئامانج و گوتیشی :"ئامانجی ئێمە ئەوەیە کە ئێران ناچار بکەین واز لە چالاکییە زیانبەخشەکانی خۆی بھێنێت. لەم سزایانەدا رژێمی ئێران کراوەتە ئامانج، نەک ئەو گەلەی کە بەھۆی ئیرادەی خراپی حکوومەتەکەیان و دزین و زۆرداری ئازار دەکێشن".

سەرۆکی ئەمریکا، دۆناڵد ترەمپ لە دوای ئەوەی تاکلایانە لە رێککەوتنی ناوەکی ئێران کشایەوە، وەزارەتی خەزێنەی ئەمریکا رایگەیاندبوو کە سزاکانی ئێران لە ماوەی ٩٠ رۆژ و ١٨٠ رۆژدا بە دوو ھەنگاوی جیاواز دەستپێدەکەن.