ئەمریکا لە سزاکانی سەر ئێران وڵاتی تورکیا دەبەخشێت

واشنتۆن - AA

وەزیری دەرەوەی ئەمریکا، مایک پۆمپیۆ رایگەیاند کە وڵاتەکەی لە چوارچێوەی پاکێجی سەپاندنی سزاکان بەسەر ئێراندا، ھەشت وڵات لە بازرگانیکردن بە نەوت لەگەڵ ئەو وڵاتە دەبەخشێت کە تورکیاش لەنێو ئەو وڵاتانە دایە.

پۆمپیۆ لەبارەی سەپاندنی سزاکان بەسەر ئێران وەڵامی پرسیاری رۆژنامەنووسانی دایەوە.

پۆمپیۆ رایگەیاند: "چین، ھیندستان، یۆنان، ژاپۆن، کۆریای باشوور، تایوان و تورکیا لە سزکانی سەر ئێران دەبەخشرێن. ھەر یەک لەم وڵاتانە لە ماوەی شەش مانگی کۆتایی، قەبارەی بازرگانی خۆیان لەگەڵ ئێران بە رێژەیەکی زۆر کەمکردووەتەوە، بە شێوەیەک کە دوو لەم وڵاتانە بە تەواوەتی پرسی ھاووردەکردنی بەرھەمیان لە ئێران راگرتووە".

پۆمپیۆ لە کۆتایی ھەفتەی رابردوو لە ھەژماری تایبەتی خۆی لە تۆڕی کۆمەڵایەتی راگەیاند کە لە سەپاندنی سزاکان ، ئیدارەی ئێران کراوەتە ئامانج و گوتیشی :"ئامانجی ئێمە ئەوەیە کە ئێران ناچار بکەین واز لە چالاکییە زیانبەخشەکانی خۆی بھێنێت. لەم سزایانەدا رژێمی ئێران کراوەتە ئامانج، نەک ئەو گەلەی کە بەھۆی ئیرادەی خراپی حکوومەتەکەیان و دزین و زۆرداری ئازار دەکێشن".

سەرۆکی ئەمریکا، دۆناڵد ترەمپ لە دوای ئەوەی تاکلایانە لە رێککەوتنی ناوەکی ئێران کشایەوە، وەزارەتی خەزێنەی ئەمریکا رایگەیاندبوو کە سزاکانی ئێران لە ماوەی ٩٠ رۆژ و ١٨٠ رۆژدا بە دوو ھەنگاوی جیاواز دەستپێدەکەن.