ئەحمەدی نەژاد داوای ئەنجامدانی خۆپیشاندانێکی فراوان دەکات

ئەنقەرە - AA

سەرکۆماری پێشووی ئێران، مەحمود ئەحمەدی نەژاد بەمەبەستی رێکخستنی خۆپیشاندانێکی فراوان بە بەشداری خەڵک بۆ "پرۆتێستۆکردنی حکوومەتی وڵاتەکەی و ئەمریکا و بەریتانیا"، داوای مۆڵەتی فەرمی لە دەسەڵاتدارانی وڵاتەکەی کرد.

بەپێی ئەو ھەواڵانەی لە راگەیاندنەکانی ئێران بڵاوکراوەتەوە، ئەحمەدی نەژاد نامەیەکی بۆ وەزیری ناوخۆی ئێران، عەبدولرەزا رەحمانی فەزلی ناردووە و رایگەیاندووە، بەپێی ماددەی ٢٧ی دەستوور، دەیانەوێت لە ٢١ی تشرینی یەکەم بە بەشداری خەڵک لە شاری تاران خۆپیشاندانێکی گەورە رێکبخەن.

ئەحمەدی نەژاد بەمەبەستی پرۆتێستۆکردنی "کێشەی ئابووری و لاوازی لە بەڕێوەبردنی وڵات و گەمارۆ ستەمکارەکانی ئەمریکا و دەستێوەردانە نهێنییەکانی بەریتانیا" داوای رێکخستنی خۆپیشاندان دەکات.

پێشتریش بانگەشەی ئەوە کرابوو کە ئەحمەدی نەژاد رۆڵی گرنگی گێراوە لە خۆپیشاندانی مانگی کانوونی یەکەمی ساڵی رابردوو لە سەرتاسەری ئێران.