ئازەربایجان و ئەرمینیا لەسەر پرسی قەرەباغ رێککەوتن

مۆسکۆ - AA

سەرۆکی رووسیا، ڤلادیمیر پوتین بڵاوی کردەوە کە لە کاتژمێر ٠٠:٠٠ی شەوی رابردووەوە ئاگربەست لەنێوان ئازەربایجان و ئەرمینیا چووەتە بواری جێبەجێکردنەوە.

پوتین لە پەیامێکی تەلەڤیزیۆنیدا، باسی لەوە کرد کە راگەیەنراوی هاوبەشی لەبارەی بابەتی قەرەباغ لەنێوان ئازەربایجان، ئەرمینیا و رووسیا پەسەند کردووە.

پوتین ئاماژەی بەوە کرد کە لە کاتژمێر ٠٠:٠٠ی شەوی رابردووەوە ئاگربەست لەنێوان ئازەربایجان و ئەرمینیا دەستیپێکردووە و، ئازەربایجان و ئەرمینیا لەو شوێنانەی کە کۆنترۆڵیان کردووە دەمێننەوە و، گوتی: ''لە هێلى پێشەوەی قەرەباغ و لەو رێڕەوەی قەرەباغ بە ئەرمینیا دەبەستێتەوە هێزەکانی ئاشتیی پارێزیی رووسیا جێگیردەکرێن''.

سەرۆکی رووسیا باسی لەوە کرد کە ئاوارە و پەنابەرەکان لە ژێر کۆنترۆڵی کۆیمسیۆنی باڵای کاروباری پەنابەران سەربە نەتەوە یەکگرتووەکان دەگەڕێنەوە بۆ قەرەباغ و ناوچەکانی دەوروبەری و، دیل و تەرمەکان دەگۆڕدرێنەوە.

پوتین ئەوەشی خستەڕوو کە بەربەستەکانی بەردەم هاتوچۆی ناوچەکە هەڵدەگیرێن و، رایگەیاند: ''گواستنەوە و کۆنترۆڵی پەیوەندی لە لایەن دامەزراوە خزمەتگوزاریەکانی ئاسایشی سنووری رووسیاوە دەستەبەر دەکرێت''.