کورتەباڵاترین ژنی تورکیا دەنگیدا

عوسمانییە - AA

کورتەباڵاترین ژنی تورکیا، ئەلیف کۆجامان لە شارۆچکەی کادیرلی سەربە پارێزگای عوسمانییە کە باڵای ٧٢،٦ سانتیمەترە لە هەڵبژاردنی سەرۆکایەتی و هەڵبژاردنە گشتییەکانی ٢٧ەمین خولی پەرلەمانی تورکیادا دەنگیدا.

ئەلیف کۆجامان لەگەڵ دایکی و برا گەورەکەیدا رووی لە خوێندنگەی کادیرلی کرد بە مەبەستی دەنگدان.

کۆجامان دوای ئەوەی ناسنامەکەی نیشاندا و دەنگی دا، بە هاوکاریی براکەی زەرفی دەنگەکانی خستە ناو سندوقەکەوە. دواتر لەگەڵ هاووڵاتییاندا وێنەی گرت و گفتوگۆی کرد، هیوای خواست کە هەڵبژاردنەکانی وڵاتەکەی ببنە مایەی خێر و بەرەکەت.

ئەلیف کۆجامان لە ساڵی ٢٠١٠دا وەک کورتەباڵاترین ژنی جیهان ناوی چووبووە ناو کتێبی گینس بۆ ژمارە پێوانەییەکان، بەڵام دواتر نازناوەکەی لە لایەن بریجت جۆردنی ئەمریکییەوە کە باڵای ٦٩ سانتیمەترە، لێوەرگیرایەوە.