ڕزگارکردنی بووک و زاوایەک کە ١١ کاتژمێر بەهۆی بەفرەوە ڕێگەیان لێگیرابوو

قەهرەمانمەڕەش - AA

لە قەزای گۆکسونی سەربە پارێزگای قەهرەمانمەڕەش، بووک و زاوایەک لە دوای ١١ کاتژمێر لە گیرخواردنیان بەهۆی بەفرەوە، ڕزگارکران.

بووک و زاوا و خێزانەکەیان کە لە قەزای سوروچی شانڵیئورفاوە بەرەو کرککالە دەچوون، بەهۆی بوونی بەفرێکی زۆر و تەمەوە لەسەر ڕێگای قەهرەمانمەڕەش-قەیسەری گیریان خوارد.

بووک و زاوا و خێزانەکەیان کە دوای ١١ کاتژمێر گیرخواردنیان لە ناوچەکە لەلایەن تیمەکانی ئافادەوە ڕزگار کران، گواسترانەوە بۆ ناوەندی کەلتووری شارەوانی گۆکسون.

سەرۆکی شارەوانی گۆکسون، سەلیم جوجە لە ناوەندی کەلتووری شارەوانی پێشوازی لە بووک و زاواکە کرد.

هاوکات بووک و زاواکە سوپاسی سەرۆکی شارەوانی و بەرپرسانیان کرد کە بەدەمیانەوە چوون و ڕزگاریان کردوون، باسیشیان لەوە کرد کە بەهۆی بەفرەوە ڕۆژێکی سەختیان بەڕێکردووە.