چاوشئۆغڵو: "تاكە بەرپرس لەوەى ئەمڕۆ لە فەڵەستين روودەدات ئيسرائيلە"

نەتەوەیەکگرتووەکان - AA

وەزیری دەرەوەی تورکیا، مەولود چاوشئۆغڵو رایگه‌یاند: "ئەم کردەوە شەرانگێزییانە بە تاوانی جەنگ دادەنرێن، ناچارین ئەنجامدەری تاوانەکە ئاشکرابکەین، تاکە بەرپرس لەوەی کە ئەمڕۆ لە قودس، کەناری رۆژئاوا و غەززە روودەدات ئیسرائیلە".

مەولود چاوشئۆغڵو لە دەستپێکی گوتارەکەیدا کە لە میانی کۆبوونەوەی کۆمەڵەی گشتیی نەتەوەیەکگرتووەکان کە بۆ تاوتوێکردنی قەیرانی نێوان ئیسرائیل و فەڵەستین بەڕێوەچوو، پێشكه‌شیكرد، سوپاسی سەرۆکی کۆمەڵەی گشتیی نەتەوەیەکگرتووەکان ڤۆڵکان بۆزکر-ی کرد بۆ دەستپێشخەرییەكەى به‌مه‌به‌ستی ئەنجامدانی ئەو کۆبوونەوەیە.

چاوشئۆغڵو سەبارەت بە ھێرشەکانی ئیسرائیل بۆ سەر فەڵەستین رایگه‌یاند: "بێدەنگی لەبەرامبەر نادادپەروەریی لەگەڵ ھاوبەشبوون لەو تاوانەی کە ئەنجامدراوە ھەمان شتە. ئەوەی لە بەرامبەر نادادپەروەریی بێدەنگ دەبێت شەیتانێکی بێ زمانە".

گوتیشی: "گەمارۆی ئیسرائیل بۆسەر کەرتی غەززە، ئەو خاکەی کردووەتە گەورەترین زیندانیی کراوە لە جیھاندا".

وەزیری دەرەوەی تورکیا جەختی لە کارکردن لەسەر میکانیزمی پاراستنی نێودەوڵەتیی بۆ سڤیلەکانی فەڵەستین کرده‌وه‌ و رایگه‌یاند: "دەبێت کار لەسەر میکانیزمی پاراستنی نێودەوڵەتیی بۆ سڤیلەکانی فەڵەستین بکەین. دەبێت ئەم کارانە، لە رێگەی ئەو ھێزە نێودەوڵەتییەی کە لە رێگەی ھاوکاری سەربازیی و دارایی وڵاتانی خۆبەخشەوە پێکدەھێندرێت، پاراستنی جەستەییش لەخۆبگرێت".