سوپای تورکیا: لەسەرانسەری وڵاتدا 417 چەکداری پەکەکە کوژراون

ئەنقەرە- AA

بەپێی روونکردنەوەیەک کە لەلایەن سەرۆکایەتی ئەرکانی سوپای تورکیاوە بڵاوکراوەتەوە، ئاماژە بەوەکراوە ئۆپەراسیۆنەکانی سەبازانی سوپای تورکیا و هێزە ئەمنییەکان لەسەرانسەری تورکیادا بۆ سەر پەکەکە، گشتگیرترین و کاریگەرترین بەرەنگاریی چەند ساڵی رابردوو بووە و بە ورەیەکی پۆڵایینەوە بەردەوامە.

لە روونکردنەوەکەدا ئاماژە بەوەکراوە لەچوارچێوەی بەرەنگاربوونەوەی تیرۆردا لەرۆژی 29ی ئابەوە تا ئێستا، لەسەرجەم ئۆپەراسیۆنەکاندا 417 چەکداری پەکەکە کوژراون. هاوکات ژمارەیەک هاوەن، مووشەک، دۆشکە و گوللـەی ئەو چەکانە و بڕێک تەقەمەنی دەستیان بەسەردا گیراوە.

لەبەرامبەر ئەمەدا 88 سەربازی سوپا گیانیان لەدەستداوە و 152ی دیکەیان برینداربوون.

لەروونکردنەوەکەی سەرۆکایەتی ئەرکانی سوپای تورکیادا باس لەوەشکراوە، هێزە چەکدارەکانی تورکیا لەچوارچێوەی دەستوور و یاساکاندا ئەو فەرمانانەی بەمەبەستی پاراستنی یەکێتیی خاک و گەلی تورکیا و یەکپارچەیی و ئاسایشی وڵات، پێیان دەدرێت لە ناوخۆ و دەرەوەی سنوورەکان بەرەنگاریی تیرۆریستان دەبنەوە.

ئاماژەی بەوەشکردووە لەبەرامبەر ئەم دۆخەدا رێکخراوی تیرۆریستیی پەکەکە پەنای بۆ چاندنی بۆمبی دەستکرد و کردەوەی خۆکوژیی بردووە و لەرێگەی ژمارەیەک ژمارەیەک چالاکییەوە کە هاووڵاتییانیشی تێدا دەکاتە ئامانج، دەیەوێت بوونی خۆی بسەلمێنێت. بەڵام ئۆپەراسیۆنی هێزە چەکدارەکانی تورکیا تاوەکو ئەو کاتەی دوایین چەکداری رێکخراوەکە بمێنێت بەهەمان ورە و خۆڕاگرییەوە بەردەوام دەبێت.