تەقینەوەی ئۆتۆمبیلێکی بۆمبڕێژکراو لە وان

لە شاری وان لەنێوان بینای پارێزگا و بارەگای ئاکپارتی لە شارەکە، تەقینەوەیەک روویداو بەهۆیەوە ٤٨ کەس برینداربوون کە برینی دووانیان سەختە.

لە روونکردنەوەیەکی نووسراودا پارێزگای وان رایگەیاند: ''لەئه‌نجامی پەلامارێکدا کە چەکدارانی پەکەکە لە رێگەی ئۆتۆمبیلێکی بۆمبرێژکراوەوە ئەنجامیاندا ٤٨ کەس بریندار بوون کە دوو پۆلیس و ٤٦یان هاووڵاتی سڤیلن".

دوای رووداوەکە بریندارەکان گەیەنرانە نەخۆشخانە و ئۆتۆمبیلە تەقێنراوەکەش لەلایەن تیمەکانی ئاگرکوژێنەوەوه‌ کوژێنرایه‌وه‌.

هاوکات بەهۆی بەهێزیی تەقینەوەکە بینای بارەگای ئاکپارتی و بیناکانی نزیک لە رووداوەکە زیانیان بەرکەوت.

لە ئێستادا پۆلیس رێوشوێنی ئەمنیی لە ناوچەکە گرتووه‌تە بەر و لێکۆلینەوە لە رووداوەکە دەستیپێکردووە.