تورکیا ١١ ھەزار تۆن پێداویستی مرۆیی دەنێرێتە کەرتی غەززە

میرسین - AA

وەزیری گەشەپێدانی تورکیا، لوتفی ئەلڤان لە رێوڕەسمی بەڕێکردنی کەشتییەکە رایگەیاند ناردنی پێداویستی مرۆیی بە کەشتییەک لە رۆژی قەدر بۆ گەلی فەلەستین و کەرتی غەززە یەکێکە لە نموونەکانی ھاوکاریکردن و ھەماھەنگیکردن.

ئەلڤان ئاماژەی بەوە دا کە لە کەشتییەکە ١١ ھەزار تۆن جلوبەرک و خۆراکی تێدایە کە لە بەندەری ئاشدۆد لە ئیسرائیلەوە بۆ کەرتی غەززە دەنێردرێت و ھەروەھا گوتیشی: "ئەو پێداویستیانە رادەستی مانگی سووری تورکی (کزڵای) کراوە و بە ھەماھەنگی وەزارەتی دەرەوە دەگەیەندرێت. بەھۆی سەرپەرشتیکردنی کارەکە و بەڕێکەوتنی کەشتییەکە ستایشی ئافاد و مانگی سووری تورکی و وەزارەتی دەرەوە دەکەم".

پاشان وەزیری گەشەپێدانی تورکیا، لوتفی ئەلڤان، پارێزگاری میرسین ئۆزدەمیر چاکاجاک و باڵیۆزی فەڵەستین لە ئەنقەرە فەید مستەفا و ژمارەیەک ئەندامانی پرۆتۆکۆڵ ماڵئاواییان لە کەشتییەکە کرد.

١١ ھەزار تۆنەکە بریتییە لە ئارد، برنج، شەکر و خۆراکی قوتی و ١٠٠ ھەزار جلوبەرگ بۆ منداڵانی کەرتی غەززە، ٢٠ ھەزار پێڵاو و ١٠ ھەزار و ١٠٤ یاری منداڵان.

چاوەڕوان دەکرێت دوای ٣٠ سەعات لە بەرێكەوتنی، کەشتییەکە بگاتە بەندەری ئاشدۆد لە ئیسرائیل.