ئەنقەرە میوانداری لووتکەی سێقۆڵی لەبارەی سووریا دەکات

ئەنقەرە - AA

بڕیارە ئەمڕۆ دووشەممە، لە ئەنقەرە پایتەختی تورکیا پێنجەمین لووتکەی سێقۆڵی لە بارەی سووریا لە نێوان سەرکۆماری تورکیا، رەجەب تەیب ئەردۆغان و سەرۆکی رووسیا، ڤلادیمیر پوتین و سەرکۆماری ئێران، حەسەن رووحانی بەڕێوەبچێت.

پێشتر سەرۆکایەتی فەرمانگەی پەیوەندییەکان لە سەرۆکایەتی کۆماری تورکیا لە بەیاننامەیەکدا رایگەیاندبوو، لە لووتکەکەدا تاوتوێی قەیرانی سووریا بە تایبەت دۆخی ئیدلب دەکرێت.

بەپێی بەیاننامەکە، هەر سێ سەرکردە باس لە کۆتاییهێنان بە ناکۆکییەکانی ئێستای ئیدلب و گەڕانەوەی ئاوارەکان بە خواستی خۆیان و رەخساندنی دۆخی ئاسایی بۆ گەڕانەوەیان، دەکەن.

هەر لە میانی لووتکەکەدا، ئەردۆغان و پوتین و رووحانی تاوتوێی بابەتی خاڵەکانی چاودێری تورکیا و بەرەنگاربوونەوەی رێکخراوە تیرۆریستییەکان لە ناوچەکەدا و دۆزینەوەی چارەسەری سیاسیی هەمیشەیی لە سووریا، دەکەن.

پێشبینی دەکرێت، سەرکۆماری تورکیا، رەجەب تەیب ئەردۆغان بەجیا لەگەڵ هەریەک لە سەرۆکی رووسیا، ڤلادیمیر پوتین و سەرکۆماری ئێران، حەسەن رووحانی کۆببێتەوە و لە میانیدا تاوتوێی پەیوەندییە دووقۆڵییەکان و پێشهاتەکانی هەرێمیی و نیودەوڵەتیی بکەن.