ئۆپه‌راسیۆنی قه‌ڵغانی فورات

ئه‌نقه‌ره‌ - AA
له‌ چوارچێوه‌ی ئۆپه‌راسیۆنی قه‌ڵغانی فوراتدا كه‌ له‌ باكووری سووریا دژبە ئامانجه‌كانی تیرۆر به‌ڕێوه‌ده‌چێت له‌ شه‌ڕو پێكدادانه‌كانی دوێنێدا دوو چه‌كداری ئۆپۆزسیۆن كوژران و، حه‌وتی دیكه‌ش بریندار بوون.
به‌پێی راگه‌یه‌نراوێك كه‌ له‌لایه‌ن سوپای توركیاوه‌ بڵاوكراوه‌ته‌وه‌، ئۆپه‌راسیۆنی قه‌ڵغانی فوڕات، كه‌ له‌ 24ی ئابی رابردوودا له‌ باكووری سووریا به‌مه‌به‌ستی له‌ناوبردنی مه‌ترسیی رێكخراوه‌ تیرۆریستییه‌كان و به‌رزكردنه‌وه‌ی ئاسایشی سنوور و، پشتیوانیكردنی هێزه‌كانی هاوپه‌یمانان ده‌ستی پێكردووه‌، درێژه‌ی هه‌یه‌ و پێی ناوه‌ته‌ 84مین رۆژییه‌وه‌.
له‌ چوارچێوه‌ی ئۆپه‌راسیۆنه‌كه‌دا، دوێنێ دووشەممە چه‌كدارانی ئۆپۆزسیۆن، كۆنترۆڵی به‌شێكی به‌رچاوی ناوچه‌كانی حازوان، شوه‌یهات شادر و باشگونیان كرد. له‌ شه‌ڕو پێكدادانه‌كانی ئه‌و رۆژه‌شدا دوو چه‌كداری ئۆپۆزسیۆن كوژران و، حه‌وتی دیكه‌ش بریندار بوون.
هاوكات له‌ چوارچێوه‌ی ئۆپه‌راسیۆنه‌كه‌دا بۆردومانی چه‌ند حه‌شارگه‌، سه‌نگەری جه‌نگیی، ناوه‌ندی ده‌ركردنی فه‌رمان و چه‌ك و ئۆتۆمبێل كرا.

لەده‌سپێكی ئۆپه‌راسیۆنه‌كه‌وه‌ تا ئێستا كه‌ له‌لایه‌ن چه‌كدارانی ئۆپۆزسیۆنه‌وه‌ ده‌ستی پێكردووه‌، نزیكه‌ی هه‌زار و 680 كیلۆمه‌تر چوارگۆشه‌ كۆنترۆڵكراوه‌ته‌وه‌. هه‌روه‌ها 36 مین و هه‌زار و 548 بۆمبی ده‌ستكرد له‌ناوبراون.