ئەنبار.. تەقینەوەیەکی خۆکوژی کەمپێکی ئاوارەکانی کردە ئامانج

ئەنبار - AA
راوێژکاری سەرۆکی ئەنجوومەنی پارێزگای ئەنبار بۆ کاروباری ئاسایش، حوسێن کەسار رایگەیاند "خۆکوژێک لە رێگەی پشتێنێکی بۆمبڕێژکراو لە نێو کەمپێکی نیشتەجێی ئاوارەکان لە رۆژئاوای روومادی خۆی تەقاندەوە".

روونیشی کردەوە کە بەهۆی ئەو کردە خۆکوژییەوە سێ مەدەنی و دوو کارمەندی پۆلیس کوژران کە یەکێکیان ئەفسەرە بە پلەی نەقیب بەناوی عودەی سەبری و هەروەها سێ مەدەنی دیکە بریندار بوون.

حوسێن کەسار ئاماژەی بەوەشکرد کە خۆکوژەکە لە بیابانەکانەوە دزەی کردووەتە ناو کەمپەکە کە ژمارەیەکی کەم لە خێزانە ئاوارەکانی شاری مووسڵ تیایدا نیشتەجێن.

راوێژکاری سەرۆکی ئەنجوومەنی پارێزگای ئەنبار گوتیشی: "تەرمی کوژراوەکان گواسترانەوە بۆ پزیشکی داد و بریندارەکانیش بەمەبەستی وەرگرتنی چارەسەری پزیشکی گواسترانەوە بۆ نەخۆشخانەی گشتی روومادی.

تا ئێستا هیچ لایەنێک بەپرسیاریەتی ئەنجامدانی هێرشەکەی نەگرتووەتە ئەستۆ، بەڵام فەرماندە سەربازییەکان ئاماژە بەوە دەکەن کە داعش بەرپرسیارە لە ئەنجامدانی ئەم کردانە.