وەزارەتی بەرگریی تورکیا: "٢٩٩ سەربازی رژێم لە چالاکی خران"

ئەنقەرە - AA
وەزارەتی بەرگریی تورکیا رایگەیاند لە ئیدلب ٨٢ ئامانجی رژێمیان پێکاوە، نۆ تانک، دوو تۆپھاوێژ، شەش راجیمە و ٢ ئۆتۆمبێلی سەربازیی تێکشکێنراون، ھەروەھا ٢٩٩ سەربازی رژێم لە چالاکی خراون.

بەپێی ئەو راگەیەندراوەی لە وەزارەتی بەرگریی تورکیا بڵاوکراوەتەوە، لە ئەنجامی تەقەی ھێزەکانی رژێمی ئەسەد، سەربازێکی سوپای تورکیا شەھید بووە و نۆ سەربازیش برینداربوون.

لە راگەیەندراوەکەدا ھاتووە: "دەستبەجێ ٨٢ ئامانجی رژێم بۆردومانکراون، ھاوکات بۆردومانکردن بەردەوامە. داوای لێخۆشبوون لە خوا بۆ شەھیدەکانمان دەکەین و سەرەخۆشی ئاراستەی خانەوادەی شەھیدان و سوپا و گەلە رەسەنەکەمان دەکەین. ھیوای زوو چاکبوونەوەش بۆ بریندارەکان دەخوازین. بە ھیچ شێوەیەک خوێنی شەھیدان بەفیڕۆ ناڕوات. بەپێی دوایین ئەو زانیاریانەی کە لە سەرچاوە جیاوازەکانی ناوچەکە وەرگیراون، لە ئیدلب ٨٢ ئامانجی رژێممان پێکاوە، نۆ تانک، دوو تۆپھاوێژ، شەش راجیمە و ٢ ئۆتۆمبێلی سەربازی تێکشکێنراون، ھەروەھا ٢٩٩ سەربازی رژێم لە چالاکی خران".