GROZNÎ
Serokê Lijneya Birêvebirinê û Midûrê Giştî yê Anadolu Agencyê (AA) Kemal Ozturk çû serdana Bakurê Qefqasyayê û çapemeniya herêmê eleqeyeke mezin nîşanî serdana Qefqesyayê ya Ozturk da.
Hevdîtinên Ozturk yên bi mensûbên çapemeniya Qeqesyayê re, di gelek manşetên saziyên çapemeniyê de cih girt.
Çapemeniya Karaçay-Çerkesê bal kişand li ser rola AAyê ya li Bakurê Qefqesyayê û diyar kir ku "AA bûyer û geşedanên herêmê radigihîne dinyayê."
Ajansa nûçeyan ya fermî ya Komara Xweser a Kabardîn-Balkarê ji bo serdana Midûrê Giştî yê AAyê Ozturk wiha nivîsî: "Ev serdan ji bo danasîna çand, edet û ber û berhemên dîrokî yên qefqesan firsendek e." Ajansê bal kişand ser dîroka AAyê, der barê Ozturk de agahî da û li ser serkeftin û pêşveçûna AAyê ya di sê salên dawîn de pêk hat sekinî. Di nûçeyê de hat destnîşankirin ku Ozturk çêkerê 170 belgefîlman e û cih dan hevpeyvîna Ozturk ya digel Midûrê Giştî yê kanala NOTRê Vladîmîr Vorokov kiribû.
Çapemeniya Çeçen jî der barê ziyareta Ozturk de nûçe weşand û diyar kir ku Ozturk dixwaze qada çapemeniyê ya herêmê firehtir bike û ev ji bo pêşveçûn û geşbûna çapemeniya herêmê pir girîng e.
Di nûçeyê de hat destnîşankirin ku li herêmê hebûna AAyê gelekî girîng e, bi navbeynkariya AAyê dê çand, edet û berhem û cih û warên dîrokî yên herêmê bên nasîn. Her wiha qada nûçeyan ya di navbera Tirkiye û Çeçenistanê de jî dê berfirehtir bibe û nûçeyên her du herêman jî dê zûtir bên ragihandin.
Serokê Lijneya Birêvebirinê û Midûrê Giştî yê Anadolu Agencyê Kemal Ozturk di navbera 27ê îlon û 1ê kewçêrê de, ji bo berfirehtirkirina qada nûçegihaniyê çûbû serdana Karaçay-Çerkes, Kabardîn-Balkar, Îngûşetya û Çeçenistana girêdayî Federasyona Rûsyayê. Ozturk li vir bi erkdarên wezareta ragihandinê, rêvebirên saziyên ragihandinê û endamên çapemeniyê re hatibû bal hev.
