Џамијата стара 500 години во Дијарбакир оштетена во пожарот за време на нападот на ПКК во неупотреблива состојба

ДИЈАРБАКИР (АА) - Фатих пашината џамија, најстарата градба во југоисточниот турски град Дијарбакир, која ја зафати пожар за време на нападот од страна на терористичката организација ПКК е во неупотреблива состојба, пренесува Anadolu Agency (AA).

Во Дијарбакир на 2 декември прогласена е забрана за излегување на улиците за да може да се изведат антитерористичките акции насочени кон припадниците на ПКК, а укината е синоќа во 23 часот.

За време на забраната за движење терористите фрлија експлозивна направа во џамијата и предизвикаа пожар. Автентичната врата на џамијата и плафонот изгореа во потполност. Разбиени се прозорците, а причинета е материјална штета и на натписите на светите книги.

Одредени внатрешни делови на џамијата потполно се девастирани.

" И покрај тоа што со години живееме во оваа населба, не видовме ваква срамота. Во каква состојба ја донесоа историската џамија? Бевме изненадени од она што го гледаме", рече еден од граѓаните кој дојде до џамијата.

Тој истакна дека во нападите куќите се претворени во урнатини и дека луѓето веќе не можат да ги користат.

Џамијата која ја нападнаа терористите ја изградил Мехмет Паша помеѓу 1516 и 1520 година. Поради тоа што нејзината купола е покриена со олово, се нарекува Куршумлиска.

Терористите и порано ја напаѓале оваа џамија. Во тој напад со оружје од голем калибар оштетени се вратата на џамијата, sидот и прозорците, а загина и полицаецот Хајдар Четин.

Ова не е единствената џамија која терористите ја напаѓале. Честа мета на нападите се и другите џамии како и одредени цркви.