АНКАРА (АА) - Портпаролот на турското Претседателство, Ибрахим Калин, денес изрази солидарност со палестинскиот народ по повод 72-годишнината од Денот на Накба, пренесува Агенција Анадолија (АА).
Во соопштението по тој повод, Калин истакна дека Накба, со која се дефинира големата катастрофа на којашто беше изложен палестинскиот народ, ја означува 72-годишната окупација, незаконитоста, угнетувањето и неправдата.
Нагласувајќи дека 70 отсто од населението на Палестина е раселено и дека 6 милиони Палестинци живеат во различни земји како бегалци, Калин рече дека и покрај одлуките на ОН и меѓународните пресуди, нелегалните еврејски населби и понатаму се градат во Источен Ерусалим (Источен Кудс) и на Западниот Брег. „Палестинските семејства се истеруваат од своите домови“, додаде тој.
Околу 650.000 израелски Евреи во моментов живеат во околу 164 населби и 116 населени комплекси во окупираните Западен Брег и Источен Ерусалим.
Меѓународното право ги смета Западниот Брег и Источен Ерусалим за окупирани територии, а сите активности за градење еврејски населби таму за нелегални.
Палестинците го користат терминот Накба, што значи катастрофа, за нивното протерување од историска Палестина од страна на ционистичките банди во 1948 година
- „Ерусалим е црвената линија“ -
„Политиката на окупација, која продолжува систематски десетици години, има намера да се прошири и да се продлабочи со плановите за анексија“, рече Калин.
Тој истакна дека врз основа на границите од 1967 година и неколку одлуки на ОН, формирањето на палестинска држава, со главен град Ерусалим, која е независна, суверена и има географски интегритет, е историско и легитимно право на палестинскиот народ.
„Не е можно воспоставување регионален и глобален мир пред палестинскиот народ да ги добие своите права“, рече тој.
Калин предупреди дека секој потег кон менување на правниот, верскиот и историскиот статус на Ерусалим е игра со оган.
„Како што изјави нашиот [турскиот] претседател Реџеп Таип Ердоган, Ерусалим е нашата црвена линија“, рече тој.
Тој, исто така, ги повика сите кои имаат чувство за закон, совест и правда да застанат против вандализмот на Израел.
„Не постои легитимитет за каков било план што го игнорира постоењето и волјата на палестинскиот народ и каков било обид за извлекување корист од Ерусалим и палестинските територии“, рече тој.
„Како Турција, ние ќе продолжиме да бидеме покрај палестинскиот народ во нивниот правичен случај под водство на нашиот претседател Реџеп Таип Ердоган“, истакна Калин.
