Турските сили во јуни неутрализираа 98 терористи на ПКК

ЕРЗУРУМ (АА) - Вкупно 98 терористи на ЈПГ/ПКК се неутрализирани во јуни од страна на турските безбедносни сили во операции во рамките на земјата и преку границите, јавува Агенција Анадолија (АА).

Антитерористичките операции се спроведени во текот на месецот од страна на Турските вооружени сили, како и од Генералниот директорат за безбедност, жандармеријата и Националната агенција за разузнавање (МИТ), според информациите собрани од АА.

Нанесувајќи ѝ силен удар на терористичката организација ПКК со успешните операции, безбедносните сили приведоа и 104 лица осомничени за тероризам, од кои 30 подоцна се притворени.

Дополнително, бројот на припадници на терористичката организација ПКК што им се предадоа на безбедносните сили преку кампањата за убедување во 2021 година се искачи на 94, сметајќи до 30 јуни.

- Неутрализирани високи припадници на терористичката ЈПГ/ПКК -

Безбедносните сили ѝ зададоа тежок удар на терористичката организација ЈПГ/ПКК со неутрализирање на нејзини високи припадници.

Во успешна операција на МИТ на 5 јуни во кампот „Махмур“, што е под контрола на ПКК/КЏК во северен Ирак, неутрализиран е високиот оперативец на ПКК, Селман Бозкир, со кодно име Доктор Хусеин, кој важел за главен раководител на кампот.

Како дел од операцијата „Ерен-1“, на 5 јуни неутрализирани се тројца терористи на ПКК во руралното подрачје на Башкале во источната турска област Ван.

Меѓу терористите беше и Гокан Демир, со кодно име Агит, кој се наоѓаше на сивата листа на барани од Министерството за внатрешни работи и беше водач на терористичката организација во Башкале.

Демир беше еден од извршителите на терористичкиот напад во областа Озалп во Ван на 15 мај 2020 година.

Во нападот загинаа вработен во Општината и еден цивил, а беше повреден уште еден вработен во Општината. Цел на нападот беше возило на групата за социјална поддршка „Вефа“.

Терористот на ПКК, Хасан Адир, алијас Салих Чирезе, кој се бараше со потерница, е неутрализиран во јуни во операција предводена од МИТ.

По одреден период на следење, МИТ изведе напад во близина на кампот „Махмур“, што служи како област за регрутирање и обука на ПКК, со цел да неутрализира терорист баран со црвена потерница од Интерпол, кој е одговорен за активностите во Махмур.

Самет Иџјер, со кодно име Зердаст-Навдар, е уште еден висок припадник на терористичката организација неутрализиран во јуни.

Во источната турска област Битлис, како дел од антитерористичката операција „Ерен-11“, Иџјер беше на портокаловата листа на барани на Министерството за внатрешни работи на Турција.

- Операциите поддржани од турското разузнавање ѝ зададоа тежок удар на ПКК -

Високиот терорист Ислам Билиз, со кодно име Сијар Ерзурум, беше фатен во операција спроведена од силите на МИТ и жандармеријата.

Терористот се наоѓаше на сивата листа на барани на турското МВР и беше фатен во операција на границата меѓу Турција и Иран во близина на Ерменија.

Улаш Доган, терорист на ПКК баран со црвена потерница од Интерпол и турското МВР, е неутрализиран во операција во северната ирачка покраина Сулејманије.

МИТ имаше претходни информации за Доган, алијас Улаш Дерсим, дека во северен Ирак планирал терористички напад против Турција.

Доган беше неутрализиран од МИТ во Калат Дизах во Сулејманије, кратко време по пристигнувањето во регионот.

Во својата над 35-годишна терористичка кампања против Турција, ПКК, којашто се наоѓа на листата терористички организации на Турција, САД и ЕУ, е одговорна за смртта на најмалку 40.000 луѓе, меѓу кои и деца и жени.