Ердоган за вестите за израелски напади врз Иран: Двете страни даваат различни изјави

АНКАРА (АА) - Турскиот претседател Реџеп Таип Ердоган денес изјави дека и Израел и Иран даваат различни изјави во врска со вестите за израелски напад врз Иран рано утрово, како и дека има нејаснотии, јавува Анадолу.

„Во моментов, Израел кажува различни работи, а Иран исто така изнесува различни ставови, односно нема јасна изјава за тоа што се случило“, изјави Ердоган за новинарите во Истанбул.

Тензиите меѓу Иран и Израел ескалираа во саботата, откако Техеран изврши напад со беспилотни летала и ракети како одговор на нападот на иранскиот Конзулат во Сирија на 1 април, во кој загинаа седум ирански воени офицери, од кои двајца команданти од највисок ранг.

Според јавувањата на американските медиуми, Израел извршил „ограничен напад“ во Иран рано утрово. Сè уште нема официјални изјави од Израел.

Ердоган, исто така, ја критикуваше одлуката на САД за вето на кандидатурата на Палестина за полноправно членство во Обединетите нации (ОН).

Во Советот за безбедност на ОН, „видовме дека САД стојат покрај Израел со ставањето вето на кандидатурата за полноправно членство на Палестина“, додаде тој.

„Додека сите застанаа покрај Палестина (во однос на нејзиното полноправно членство во ОН), за жал, САД го покажаа својот став застанувајќи на страната на Израел“, рече тој.

Коментирајќи за претстојната посета на грчкиот премиер Киријакос Мицотакис на Туркије „како еден вид возвратна посета“, Ердоган рече дека посетата ќе биде „значајна пресвртница“ во билатералните односи.