ИСТАНБУЛ (АА) - Утринава четиринаесетгодишно девојче го загуби животот, а десетици се повредени поради паника и страв за време на земјотресот со магнитуда од 5,8 степени според Рихтер што го погоди брегот на Мармарис во југозападната турска област Мугла, јавува Анадолу.

Афранур Ѓунлу доживеала напад на паника за време на потресот во округот Фетије и итно била пренесена во болница, но и покрај медицинската интервенција не е спасена, потврди гувернерот на Мугла, Идрис Акбијик.

Земјотресот, кој се случи на длабочина од 67,91 километри и на 10,43 километри од брегот на Мармарис во Средоземното Море, не предизвика големи штети на објектите, но поради паника и страв многумина скокале од височини или бегале од зградите.

Гувернерот Акбијик изјави дека 69 лица биле повредени во земјотресот, а повредите во голема мера се резултат на панични обиди за бегство.

„Вкупно 55 граѓани се примени во болниците. Четиринаесет граѓани одбија да бидат хоспитализирани и им беше укажана лекарска помош на самото место“, рече тој.

„Еден пациент е хоспитализиран, 46 се на лекување во одделите за итни случаи, а осуммина се отпуштени.“

Првичните процени покажаа само мали штети на две згради во Мармарис, како и пукнатини на ѕидовите, но не е пријавено значително оштетување.