Битлис, кој се наоѓа во источниот дел на Анадолија, западно од езерото Ван, ги пречекува посетителите во сите периоди од годината со својата длабока историја од Урарту до Османлиите, историските градби, природните убавини и богатата гастрономија.
Во текот на историјата градот бил домаќин на бројни цивилизации, меѓу кои Урарту, Асирците, Медијците, Персијците, Македонците, Византијците, Селџуците и Османлиите. Се верува дека името на градот потекнува од Бедлис, еден од командантите на Александар Велики.
Битлис, кој е познат и како „Убавиот град во долината“ бидејќи е изграден во долина опкружена со историски градби, во периодот на Селџуците и Османлиите се развил како центар на науката, културата и трговијата.
Градот, кој се смета за една од важните културни рути во Анадолија со своите тврдини, џамии, медреси, кубиња и историски гробишта, се издвојува и со областите Ахлат, Татван и Адилџеваз покрај езерото Ван, кои се познати по своето историско наследство и природни убавини.
Меѓу главните места што можат да се посетат во Битлис се Музејот на историскиот град Битлис, видиковецот Битлис, Селџучките гробишта на плоштадот во Ахлат, Урартската куќа, џамијата Зал Паша, Големата џамија во Адилџеваз и кратерското езеро Немрут.
- Музејот на историскиот град што го осветлува минатото на Битлис
Музејот на историскиот град Битлис, што се наоѓа во центарот на градот, ги пречекува посетителите во историска зграда изградена од ахлатски камен, која во минатото се користела како гувернерска резиденција.
Во музејот, каде што се претставува културното наследство на регионот, се изложени украсени камења, рачни мелници, надгробни плочи и архитектонски делови од базалт. Архитектонските украси и натписите нудат важни информации за општествениот живот, религиозните сфаќања и каменорезачката уметност од тој период.
- Историскиот град од птичја перспектива: Видиковецот Битлис
Видиковецот Битлис, кој се наоѓа на доминантна позиција над центарот на градот, овозможува панорамско набљудување на историската градска структура и околните природни убавини.
Местото е особено привлечно поради глетките при изгрејсонце и зајдисонце и е една од најважните точки од каде можат заедно да се видат тврдината Битлис и историските камени градби.
- Врвот на селџучката каменорезачка уметност: Селџучките гробишта на плоштадот во Ахлат
Областа Ахлат, која се наоѓа северозападно од езерото Ван, во периодот на Селџуците била важен центар на науката и културата и била нарекувана „Куббет-ул Ислам“.
Селџучките гробишта на плоштадот во Ахлат, со површина од околу 210 илјади квадратни метри, се сметаат за најголеми турско-исламски гробишта во Турција и меѓу најголемите во светот, а привлекуваат внимание со монументалните надгробни споменици.
Надгробните плочи украсени со геометриски и растителни мотиви се меѓу најважните примери на селџучката каменорезачка уметност, додека натписите на нив го осветлуваат општествениот и културниот живот од тој период. Старото населено место Ахлат и надгробните плочи се заштитени во рамки на листата на светско наследство на УНЕСКО поради својата универзална вредност.
Урартската куќа во Ахлат ја претставува животната култура и архитектурата на Урартците, една од древните цивилизации во регионот. Во објектот подготвен според традиционалните архитектонски принципи, на посетителите им се пренесуваат информации за начинот на живот, уметноста и секојдневието во периодот на Урарту.
- Историските џамии го одржуваат културното наследство
Џамијата Зал-паша, која се наоѓа покрај езерото Ван, ги пречекува посетителите на патот Адилџеваз - Ахлат со поглед кон езерото. Џамијата има 12 мали куполи и може да се посетува и надвор од времето за молитва.
Големата џамија во Адилџеваз, според натписот, била обновена во 1150 година. Објектот, кој се издвојува со покривот со конусен врв и минарето изградено одделно од џамијата, е меѓу важните историски дела во регионот.
- Единственото наследство на вулканската природа: Кратерското езеро Немрут
Кратерското езеро Немрут, кое се наоѓа во границите на областа Татван, е познато како второ најголемо кратерско езеро во светот и најголемо во Турција.
Во кратерската област, која се наоѓа на околу 2.250 метри надморска височина, има топли и студени езера, отвори со пареа и богата вегетација. Со својата вулканска структура и панорамски погледи, кратерското езеро Немрут е една од омилените дестинации за љубителите на природата и фотографијата.
- Од буријан до хелисе: Кујната на Битлис
Битлис, покрај историските и природните убавини, се издвојува и како важна дестинација за гастрономскиот туризам со својата богата кулинарска традиција.
Симболот на градската кујна, ќебапот буријан, се подготвува со посебна техника на долго печење во земјени тандури. Авшор чорбата, која се консумира заедно со буријанот, е меѓу незаменливите вкусови на локалната кујна.
Џигер тапламаси, катикли долма, келедош и хелисе се меѓу познатите јадења на кујната на Битлис. Овие јадења, подготвени со локални билки и традиционални техники на готвење, ја пренесуваат вековната кулинарска култура на градот до денес.
