Во Истанбул започна 19. Веронски евроазиски економски форум

Денес во Истанбул започна 19. Веронски евроазиски економски форум, на кој учествуваат политички, дипломатски, академски и деловни претставници од повеќе од 30 земји, јавува Анадолу.

Дводневниот форум, кој се одржува во палатата Чираган под мотото „Предизвиците на светот што се менува и економијата што се менува“, ќе се фокусира на главните промени во глобалната економија и геополитичкиот пејзаж.

На отворањето ќе учествуваат турскиот министер за финансии и трезор Мехмет Шимшек, рускиот заменик-министер за надворешни работи Александар Грушко, прв заменик-директор на руската државна корпорација за нуклеарна енергија „Росатом“, Кирил Комаров и претседателот на италијанското здружение „Коношере Еуразија“, Антонио Фалико.

На форумот ќе се разговара за улогата на Турција во глобалната економија, енергетиката, односите меѓу САД и Евроазија, реиндустријализацијата, технолошкиот суверенитет, финансиските пазари, здравствената заштита и транспортните системи.

На настанот, исто така, ќе се разгледуваат променливата геополитичка позиција на Евроазија и можностите за економска соработка во услови на растечка глобална неизвесност.

Форумот ќе заврши утре.